InfoHub Logo

Mektepte oqýshylardy tamaqtandyrýdy uıymdastyrý erejesine ózgerister engizildi. Bul týraly QR oqý-aǵartý mınıstri Ashat Aımaǵambetov óziniń Telegram kanalynda habarlady.

Mınıstr buǵan deıin mektep ashanalaryndaǵy ónimderdiń qymbattyǵy týraly jazǵan edi. Býfet ónimderiniń baǵasy kórshi dúkenge qaraǵanda eki ese qymbat bolatyn jaǵdaılar da kezdesedi. Endi mamandardyń qatysýymen jumys toby qurylyp, qajetti túzetýler ázirlengenin málimdep otyr.

«Qandaı ózgeris engizildi? Endi qyzmetterdi jetkizýshilermen azyq-túlikpen qamtamasyz etý týraly jańa sharttar jasalǵannan keıin mektep ashanalaryndaǵy baǵalar, onyń ishinde býfet ónimderi, sýsyndar jáne t.b. qyzmet kórsetýshilerdiń qalaýy boıynsha emes, ortasha naryqtyq baǵalardy eskere otyryp qalyptastyrylady.

Sondaı-aq memlekettik satyp alý portalyndaǵy derekter bazasy men statısıka organdarynyń aqparaty negizge alynady. Bul ashanalarda baǵanyń kóterilýine jol bermeıdi.

Sonymen qatar endi jetkizýshiler tenderdi uıymdastyrýshynyń konkýrs qujattamasynda kórsetken as máziri men baǵalarǵa sáıkes qatań jumys isteıdi. Bul tyıym salynǵan ónimderdi óndirý jáne ótkizý táýekelderin joıý, sonymen birge býfet ónimderiniń baǵasyn belgileý úshin qajet.

Sondaı-aq ata-analardy tamaqtaný týraly habardar etý nemese onyń sapasyn baǵalaı alýy úshin bilim resýrsyna kezeń-kezeńimen norma engiziledi. Ol - paıdalanýshylarǵa qyzmet kórsetý jáne qolma-qol aqshasyz tólemder sapasyn baǵalaýǵa múmkindik beretin taǵamdardyń, as máziriniń, baǵalardyń fotosýretterin jarıalaý normasy.

Sonymen qatar balabaqshalarda, balalar úılerinde balalardy úzdiksiz tamaqpen qamtamasyz etý úshin jergilikti atqarýshy organdardyń ınflásıa deńgeıin eskere otyryp, azyq-túlik baǵasynyń ózgerýi bóliginde satyp alý týraly sharttarǵa ózgerister engizý múmkindigi kózdelgen» dep jazdy Ashat Aımaǵambetov.

Mınıstrdiń aıtýynsha, azyq-túlik baǵasynyń ósýine baılanysty qańtar aıynda memlekettik satyp alý qorytyndysy boıynsha, mysaly, kartop 100 teńge turatyn kelisimshart jasalǵan jaǵdaılar jıi kezdesken. Keıin birneshe aı ótken soń jetkizýshi taýardy jetkizýden bas tartyp, nátıjesinde uıym azyq-túliksiz qalǵan.
«Sot prosedýrasyna engizilgen josyqsyz jetkizýshilerdiń tizimi bar ekeni túsinikti, biraq kóptegen jetkizýshi muny elemeıdi, sóıtip jańa uıym ashylyp, jumysyn jalǵastyra beredi. Biraq bul ýaqytta balabaqsha búldirshinderdi tamaqpen qamtamasyz ete almaı otyrady. Endi jańa norma boıynsha ákimdikter mundaı jaǵdaılarda osy ónimderdiń ortasha baǵasyna sáıkes uıymdardy úzdiksiz qamtamasyz etý úshin qosymsha kelisim jasaıdy.

Bul erejeler kelesi jyldan bastap qyzmet kórsetýshilermen jańa kelisimsharttar jasalǵannan keıin qoldanysqa engiziledi», - dedi ol.
Ashat Aımaǵambetov Almatyda osyndaı pılottyq joba bastalyp ta ketkenin aıtady.

«Almatyda mektepte tamaqtandyrýdy uıymdastyrý boıynsha pılottyq joba bastalǵanyn atap ótkim keledi.

Búgingi tańda tamaqtanýdy uıymdastyrý prosesin ońtaılandyrýǵa jáne jedeldetýge baǵyttalǵan pılot qalanyń úsh mektebinde iske qosyldy.

Sondaı-aq, mektep as mázirin qalyptastyrý tásilderin jańartý jumystaryn da bastap kettik», - dep túıdi sózin vedomstvo basshysy.

---