InfoHub Logo

Sary ala kúzdiń kelbeti, sary dalany syıqyrlaǵanyna búgin tórtinshi kúnge taıap keledi. Qoǵamǵa tulǵa retinde, sara jolymnyń alǵashqy baspaldaǵyna aqyryn ǵana qadam basyp kelemin. Adamnyń armany sheksizdikpen toǵysatyn, sanada jarq etetin saf ıdeıalar jıyntyǵy ispettes. "Kúz kelbetin salqyn sanap, kópshiligimizdiń jatsynatynymyz jasyryn emes. Biraq bilesiz be, keshe ǵana kirip kelgen tabıǵattyń bul mezgilin alǵash ret sulý kelbette kútip aldym".  Qabaǵy- qatýly, jańbyryn tógip jiberetin- jylaýyq, jasyl dalany kún kózindeı kelbetke orandyratyn sary kúzdi- men jany náziktik pen sulýlyqqa qushtar qyz balasyndaı kórdim.

Qatýlylyǵy- erkek jaratylysyna ońaılyqpen ere qoımaıtyn qaısar qyzdy eske túsirse, tolassyz jańbyry- sylań qaǵyp, sybdyr kúlkisimen janyńdy baýraıtyn názik jandylardyń mamyqtaı kóńilderiniń súıkimdi kelbette burtıa qalatyny, aınalany altynǵa oraýy- áıel tabıǵatynyń qolynan keletin qaýqardyń qanshalyqty myqty ekenin kórsetýge umtylǵysy keletindeı. Bul oılardyń týýyna  Qazaq Ulttyq Qyzdar Pedagogıkalyq Ýnıversıtetinde oqysam, tunyp turǵan bilim men tárbıeniń ordasyna enip, 75 jyldyq tarıhy bar "Ustazdardyń sheberhanasyna" aınalǵan, qazaq qyzdarynyń kıeli mekeni bolǵan, qara shańyraqta bilim alsam degen asqaq Armanymnyń oryndalyp otyrǵanynda. 

Elimizde joǵary oqý oryndary kóp. Biraq, meniń tańdaýym ne úshin QazUQPÝ? 

- Ol jany men táni taza qazaq qyzdarynyń kelbetin tereńinen tanyp, apalarymnyń izin basyp, danalyǵy men ósıetterin boıǵa sińirip, qundylyqtaryna qanyq bolyp, keleshekke naǵyz batyr, ór minezdi, tazalyq pen sulýlyqqa jany qushtar, qazaqılyq tárbıege sýsyndap, básekege qabiletti, kez-kelgen ortada kóshbasshylyqqa laıyqty retinde, óz isiniń naǵyz mamany atanyp, Elime, Halqyma qyzmet etip, úlken kisilerdiń batasyn alyp, el azamattaryn tárbıelep, tálim berip, egde tartqanda ómirimniń bos ótpegenin sezingim kelgen osyndaı bolashaqqa qurylǵan súıkimdi armanym men qıalymnyń jeteginde, aqyl men júrek qalaýy túıisken ortasynda tańdaý jasap kelip otyrǵan oqý ordam- osy QazUQPÝ! Qas pen kózdiń arasynda zymyraıtyn altyn ýaqyt nesimen erekshe degen saýalǵa,  jaqsy jandardyń tálim men tárbıesi toǵysqan altyn ordada bas qosyp, ıgi jaqsylardyń yqpalynan bolashaq maman retinde ótkizgen kezeńim der edim!

Árbir ǵımaratyna kirgennen-aq qazaq ómiriniń ıisi ańqıdy: mádenıetimizdiń, ulttyq kıimderimiz ben buıymdarymyzdyń munda qanshalyqty asqaqtap, qurmettelip, ulyqtalyp turǵanyn kórip kózim toıdy.  Ýnıversıtettiń ár qabyrǵa, ár buryshtarynda- ónegelik! Ulttyq qundylyqtar dáriptelip, naǵyz qazaq qyzdarynyń aýyly, shańyraǵy tilsiz saırap tur. 

Armanymnyń aldamaǵanyna kózim jetti!

Meniń osynda oqýǵa túsýdegi maqsatym, bilim ordasynda qazaqy orbıtanyń qalyptasýy.! Keń etek jaıýy!

Men bolashaǵyma senemin!

Gúldana BEKBOLAT

---