InfoHub Logo

Taqyryby: «Myń jasa, Táýelsiz Qazaq eli!».
Maqsaty: 1) Oqýshylardy táýelsiz elin, jerin, sheksiz súıý arqyly, táýelsizdik qasıetti uǵym ekenine kóz jetkizý; - táýelsizdik ańsaǵan ata – baba amanatyna adal bolýǵa, erliginen úlgi alýǵa úıretip otanshyldyq sezimderin oıatyp, ultynyń salt – dástúrin, dini men tilin súıe bilýge tárbıeleý.
Sabaqtyń túri: konferensıa saǵaty
Sabaqtyń ádisi: pikirtalas, oı qozǵaý, boljaý ádisi, keri baılanys
Pán aralyq baılanys: tarıh, qazaq tili, mýzyka, qolóner.
Qoldanylatyn tehnologıasy: syn turǵysynan oılaý

Barysy:
İ. Uıymdastyrý bólimi.
Búgin konferensıaǵa bilimniń tárbıe salasynan, áleýmettik quqyq qorǵaý salasynan jáne psıhologıa salasynan delegattar kelip otyr. Delegattardy qarsy alý.

İİ. Psıhologıalyq kezeń:
«Táýelsizdikke 25 jyl» beınetaspany qaraý.
- Qurmetti delegattar búgingi konferensıanyń taqyryby: «Myń jasa, Táýelsiz Qazaq eli!».
Konferensıanyń urany: «Táýelsizdik el tiregi - bilimdi urpaq»
Oqyrman konferensıasy - oqyrmandarmen júrgiziletin belsendi jumys túriniń biri. Oqyrman konferensıasynyń máni onyń ótkizilýinde ǵana emes, ár oqyrmannyń sol kitap jaıly óz kózqarasyn, pikirin tyńdaý, dáleldeý jáne ózge pikirlermen de sanasý bolyp tabylady. Konferensıa pikir almasý túrinde ótkendikten, onyń negizine oqyǵandy taldaý jatady.
Oqyrman konferensıasynyń túrleri: mazmuny boıynsha - kórkem shyǵarmalar jáne arnaıy ádebıetter bolyp bólinedi. Kásibı, ǵylymı ádebıetterge okyrman konferensıasyn ótkizý óndiris jáne ǵylymı mekemelerde ótkiziledi. Kóbinese ondaı konferensıalar kásibı deńgeıdi kóterýge arnalǵan oqýlyqtar, monografıalar, basylymdar bolýy múmkin. Mundaı taldaýlar ǵylymı kitaphanalardyń oqý oryndarynyń kafedralarynda ótetin ádistemelik semınar aıasynda uıymdastyrylýy múmkin.
Kóbinese, oqyrmandar konferensıasy kórkem ádebıetterdi talqylaýǵa arnalady, Olar bir nemese taqyryp boıynsha toptastyrylǵan birneshe kitapty (taqyryptyq), jeke avtorlardyń shyǵarmashylyǵyna arnalýy múmkin.
Oqyrmandar konfrensıasynyń kelesi túri - avtordyń qatystyrylýy arqyly ótetin oqyrman konferensıasy. Konferensıanyń bul túri shyǵarma avtorymen dıdarlasýǵa múmkindik beredi. Konferensıaǵa kelgen oqyrmandardy tek jazýshynyń jeke ómiri ǵana qyzyqtyryp qoımaıtyny belgili, onyń shyǵarmashylyǵy týraly kelgen oqyrmandar aıtsa, ol áserli bolady.
Konferensıanyń kelesi túri — kórermen - oqyrman konferensıasy. Bul konferensıa 1970 jyldary paıda boldy. Sol jyldary teledıdar jáne kıno arqyly kórkem ádebıetter ekranǵa kóptep shyǵa bastady. Bul konferensıa negizine oqyrmandyq qyzyǵýshylyq pen kórermendik qyzyǵýshylyq qatar júredi.
Oqyrman konferensıasynyń kelesi túri — syrttaı oqyrmandar konferensıasy. Ereksheligi: konferensıa betpe-bet ótpeıdi, kerisinshe BAQ arqyly - gazet, keıde radıo, teledıdar arqyly ótkiziledi. Taldaýǵa qatysatyn aýdıtorıa aýqymy úlken. Iaǵnı, qaı jerde turmasyn, qaı ýaqytta bolmasyn adamdardyń pikirin oqyp, tanysýyna bolady. (mysaly: "Ákeler izimen" 'Kórkem ádebıettegi jumysshy taby" t. b sondaı - aq, aýdandyq gazetterde aýyl sharýashylyǵyna arnalǵan taqyryptarda - ozyq tájirıbelerdi nasıhattaý maqsatynda jergilikti avtorlar shyǵarmalary).
Sizder aldyn ala konferensıada qandaı másele kóteriletinin bilgendikten, sizderdiń ruqsattaryńyzben birden sol máselelerdi qarastyrýǵa kóshsek deımin.

İİİ. Úı tapsyrmasyn zertteý:
a) zerttep kelgen jumysyn, jınaǵan aqparatyn qorǵaý:
á) boljaý
b) bekitý

IV. Operasıalyq – oryndaýshylyq (tájirıbelik) kezeń:
Kórermen - oqyrman konferensıasy.
1 - top - «Babalar ańsaǵan azattyq»
2 - top - «Táýelsizdikke 25 jyl»
3 - top - «Máńgilik el muratym»

V. Tanymdyq aqparattyq kezeń
Syrttaı oqyrmandar konferensıasy.
Qazaqstan Respýblıkasynyń Táýelsizdik kúnine arnalǵan saltanatty jıynda QR Prezıdenti Nursultan Nazarbaev óziniń «Táýelsizdik tolǵaýyn» jarıalady.
Halqymyzdyń qasterli Táýelsizdigi men Máńgilik Elimizdiń bolashaǵy meni únemi tolǵandyrady. «Táýelsizdiktiń ómirlik fılosofıasy qandaı bolýy kerek?» degen saýaldy men ózime sát saıyn qoıyp otyramyn. Osy jaıyndaǵy oı oramdaryn qaǵazǵa túsirip «Táýelsizdik tolǵaýy» dep ataǵym keldi. Ol azat elimizdiń kúlli azamattaryna, jalyndy jastarǵa búgingi býynnyń eren isterin laıyqty jalǵastyryp, erteńgi urpaqqa arnalady. Zaman aǵymy bizdi Qazaqstan Respýblıkasy tuńǵysh ret táýelsiz el retinde álemge áıgilengen tarıhı data - 1991 jyldyń 16 jeltoqsanynan kún saıyn, saǵat saıyn alystatyp barady. Biz jyl ótken saıyn sol bir tarıhı tańdaýdyń sarqylmas qudiretin jan júregimizben túsinemiz. Ol - egemen memlekette beıbitshilik pen kelisimde, ózara senimde azat ómir súrý tańdaýy. Ol týǵan jerimizdiń qazynasy men qazba baılyǵyna derbes ıelik etip, barsha qoǵamnyń ıgiligi úshin óz qalaýymyzben jumsaý tańdaýy. Ol - óz taǵdyrymyzdy ózimiz aıqyndaý, bolashaǵymyzdy óz qolymyzben jasaý tańdaýy. Bizdiń jańa Qazaqstanymyz jaryq juldyz bolyp dúnıege keldi. Barshamyzdy Táýelsizdiktiń Uly rýhy jebeıdi, biriktiredi, boıymyzǵa qýat berip, senimimizdi nyǵaıtady. Ol altyn kúni jarqyrap, altyn qyrany qalyqtaǵan Qazaq Eliniń ashyq aspany astynda dúnıege kelgen árbir sábıdiń júregine ornaıdy. Ol árbir azamattyń júreginde, ár shańyraqtyń tórinde, elimizde boı kótergen árbir úıde, árbir qala men aýylda saltanat quraldy. Ol bizdiń ósimimen, árbir jańa óndiris orynymen, ulanǵaıyr Otanymyzǵa tóselgen árbir kúre jolmen, dala tósine óngen árbir tonna altyn dánmen nyǵaıady. Táýelsizdik - san býyn babalardyń qasıetti jerimizdiń árbir qadamyn qorǵaý úshin tógilgen ólsheýsiz qany men teriniń óteýi. Táýelsizdik keshegi batyr babalar ósıet etkenindeı, Qazaqstandy qasyq qany qalǵansha qorǵaý jónindegi árbir azamattyń qaısar sheshimi. Biz júrgizip otyrǵan syrtqy jáne ishki saıasat – halyqtyń danalyǵy. Qazaqstandy órkendetý jolyndaǵy kúlli jaýapty sheshimderdiń danalyǵy. Halqymyzdyń asqaq abyroıynyń, qonaqjaılylyǵy men keń peıiliniń danalyǵy. Táýelsizdik degenimiz - bul jalpyǵa ortaq eńbek. Ǵylym qýyp, bilim izdegen oqýshylar men stýdentterdiń eńbegi. Elimizdiń ulttyq baılyǵyn eseleı túsetin barsha mamandyq ıeleriniń eńbegi. Árbir jas býynnyń júregine Otanǵa degen sheksiz súıispenshilik darytatyn qazaqstandyqtardyń eńbegi,- dep atap ótken Nursultan Ábishuly onyń kókjıegin jahandyq deńgeıge jaıǵan san qyrly mádenıeti bar ekendigine de toqtalyp ótti.- Onyń ǵylymǵa, ınovasıalar men progreske árdaıym aıqara ashyq esigi bar. Onyń kózdegen mejelerine qalaıda jetetin mádenıeti bar. Al Máńgilik El - Táýelsizdiktiń ómirlik fılosofıasy. Bul qaǵıdalardy múltiksiz saqtaı otyryp, biz Otanymyzdyń kók baıraǵyn nyq ustaımyz. Ony Qazaqstan damýynyń jańa bıikterinde asqaqtata jelbiretemiz. Bul - bizdiń máńgilik ustanymymyz! - dedi Elbasy.

«Táýelsizdik tolǵaýy» tyńdalyp, Elbasyna lebizderi oqylady.
Vİ. Bekitý: «Táýelsizdikke tilek»
Kún dóńgelegi ilinip, kúnniń ár araıyna táýelsizdikke tilek jazylyp ilinedi.

VİI. Refleksıalyq - baǵalaý kezeńi (pikir)
Ár top ózderine berilgen tapsyrmalar logotıpin jasaıdy.

Muǵalim sózi:
Táýelsizdik – táńirdiń bizdiń urpaqqa bergen úlken baqyty, halqymyzdyń máńgilik qundylyǵy. Biz búginge deıin barlyq jetistikterimizge Táýelsizdiktiń arqasynda qol jetkizdik. 25 jyl ishinde eldiń ál - aýqatyn kóterip, tól mádenıetimiz ben memlekettik tildi jańǵyrtý isinde qyrýar jumystar jasadyq. Elimizde bilim, ǵylym, densaýlyq, sport salalary aıryqsha damý ústinde.
Táýelsizdik – bizdiń eń basty ıgiligimiz, baǵa jetpes qundylyǵymyz. Jas memleket tarıhyndaǵy jańa dáýir osy Táýelsizdikten bastaý alady. Sondyqtan Táýelsizdik erekshe mańyzǵa ıe. Barshalaryńyzdy Táýelsizdik merekesimen quttyqtaımyn!
Q. Sarın «Táýelsizdik» óleńi. Oqıtyn: Qıynbaeva A.
Úıge tapsyrma: «Men táýelsizdikti qalaı túsinemin?» esse jazý.

Abdýllına Nurshat Qylyshbekqyzy
Qazaq tili men ádebıeti pániniń muǵalimi