InfoHub Logo

H. Dosmuhamedov atyndaǵy Atyraý memlekettik ýnıversıteti
jýrnalısıka mamandyǵynyń III kýrs stýdenti Tileýjan Ulpan

Elimizde densaýlyq saqtaý salasynyń baǵytyn jaqsartý maqsatymen «Mindetti áleýmettik medısınalyq saqtandyrý» júıesin engizdi. Elbasymyzdyń Joldaýynda kórinis tapqan bul júıeniń qajettiligi densaýlyq saqtaýdyń shyǵyndaryn azaıtyp, qazirgi demografályq úrdis boıynsha qartaıǵan qoǵam sanatyna qosylmaý úshin, memlekettiń múmkindikterin arttyryp, damyǵan 30 eldiń qataryna ený maqsatynan týyndap otyr. Mindetti medısınalyq saqtandyrý barsha ult densaýlyǵyna degen ortaq jaýapkershilikti júkteıdi.

Mindetti medısınalyq saqtandyrý respýblıka turǵyndaryn bir jınaqtalǵan qordan qamtamasyz etedi. Saqtandyrý jarnasyn memleket, jumys berýshi ári azamattar tabystary arqyly tóleıdi. Bul rette ekonomıkalyq belsendiligi tómen halyq úshin jarnany memleket tóleıtinin atap ótý kerek. Atalmysh qorǵa jarna tóleýden bosatylatyn turǵyndardyń densaýlyq saqtaý jáne áleýmettik damý mınıstrligi 15 sanatyn belgilep otyr. Onyń ishinde on ekisi — halyqtyń áleýmettik turǵydan osal toby. Iaǵnı, qorǵa salatyn qarajaty joq jandarǵa memleket aqsha tóleıdi. Mysaly, «Altyn alqa», «Kúmis alqa» ıegerleri, «Batyr ana» ataǵyn alǵandar, sonymen qatar, I jáne II dárejeli «Ana dańqy» ordenimen marapattalǵan kóp balaly analar men Uly Otan soǵysynyń ardagerleri jáne múgedekterge memleket tarapynan tólemder jasalady. Jumyssyz júkti áıelder men zeınetkerler jáne jumyssyz retinde tirkelgen, taǵy basqa azamattarǵa da jeńildikter qarastyrylǵan. Azamattar medısınalyq kómekti arnaıy qorǵa jınalǵan qarajat esebinen ǵana ala alady degen sóz. Qarapaıym tilmen aıtqanda: «Shama — sharqyńa qaraı tóle, kómekti qajetinshe al».

MÁMS-dyń qyzmetine: ambýlatorlyq medısınalyq qyzmetter (alǵashqy kómek, konsýltasıa), stasıonarda emdeý, aýrýhanada emdelý, hırýrgıa, zerthana qyzmeti, resept boıynsha beriletin keıbir dári—dármektiń túrleri jáne basqa da qyzmet túrleri jatady.

2017 jyldyń maýsym aıynda bastalýy kerek bul júıeniń jumysy 2019 jylǵa qaraı shegerildi. Qazirgi tańda túsindirý jumystary qarqyndy túrde júrgizilip jatyr. Degenmen qarapaıym halyqqa aqparattyń áli de tolyq jetkizilmeýi sebebinen keı turǵyndar bul júıeden shyǵyndalyp qalmaımyz ba dep qorqady.

Bul jóninde №1 qalalyq emhananyń uıymdastyrý bóliminiń meńgerýshisi Indıra Jeksenǵalıqyzy bylaı deıdi: «Mindetti áleýmettik medısınalyq saqtandyrý júıesi boıynsha tegin emdeý qyzmetterin alýǵa múmkindigińiz bar. Keı turǵyndar atalǵan júıe boıynsha qate túsinik qalyptastyryp alǵan. Olardyń oıynsha, jalaqyny az taýyp, qarajatty az mólsherde quıatyn bolsa, sol mólsherde ǵana tegin emdele alady. Olaı emes. Mysaly bireý 300myń jalaqy alyp, aıyna 3myń teńge salady. Al ekinshisi 30 myń jalaqy alyp, 300 teńge ǵana salady. Biraq ekeýi de birdeı emdeý qyzmetterinen ótedi. Eger az salym salǵan turǵynnyń qarajaty belgili bir operasıaǵa jetpeýi múmkin. Degenmen ol turǵyndy emdeý úshin jalpy qordan qarjy alynady».  

Mindetti áleýmetik medısınalyq saqtandyrý qajet pe?! Mindetti áleýmettik medısınalyq saqtandyrý júıesin paıdalaný arqyly densaýlyq saqtaý salasyn damytamyz, eńbek etýge qolaıly jaǵdaı jasaımyz, únemi óz densaýlyǵymyzdy baqylaýda ustaımyz.

---