InfoHub Logo

Ala mysyqtyń kishkentaı kúninen mańdaıy terlep eńbek etip, tamaq taýyp ishken kúni joq. Basqa mysyqtardaı saraıdan tyshqan aýlaý, qojasynyń as-sýyn tyshqannan qorǵaý degen onda joq. Qaıta tyshqandarǵa qosylyp, et bolsa dalaǵa alyp ketip, maı bolsa, qaryndy tesip, sút-qaımaqqa túsip, ábden toıyp alyp, pesh ústine pyr-pyr uıyqtaıdy. Ala mysyqtyń uıqyǵa ketkenin bilip alǵan tyshqandar qorqynyshsyz án salyp, bı bıleıtin bolsa kerek.

Ury, jalqaý ala mysyq,
Saýǵan sútten urlap iship,
Et pen maıǵa syzdap ishi,
Uıyqtap jatyr sulap túsip.
Shıq, shıq, shıq!
Tyshqandardy jalqaý deıdi.
Túk bilmeıtin ańqaý deıdi,
Úlkenderdi ury deıdi,
Balalardy mylqaý deıdi.
Shıq, shıqshıq!

Tyshqandar osylaı án detip, úı edeniniń astyn dýmandatyp jiberipti. Muny mysyq estip, shoshyp oıanady da, tyshqandardyń myna ánderin estise, qojaıynym kózimdi qurtar dep qorqady. Mysyq aılaǵa kóship:

Sender oınap qýansyn dep,
Qarny toıyp jubansyn dep,
Eshqaısyńa tımeýshi edim,
Zulymdyqty súımeýshi edim.
Mıaý, Mıaý!
Aıtqanyma sene qoıshy,
Mańdaıyńnan ıiskeıin,
Balapandar kele qoıshy,
Eshqaısyńa tıispeıin.
Mıaý, mıaý!

Buǵan tyshqandardyń keıbireýleri senip te qalady. Biraq kári tyshqandar jaǵysaqtyǵyn bildirip:

Biz mysyqqa senbeımiz,
Aıtqanyna kónbeımiz,
Ótirikshi, ol urlyqshy,
Shaqyrsa da kelmeımiz.
Shıq, shık, shıq, — deıdi.

Buǵan ábden yzalanǵan mysyq edendegi kishkene sańylaýdy ańdyp jatyp alypty. Mysyqtyń ıisin alystan sezetin eresek tyshqandar sańylaýǵa jolamaıdy.Jańa ǵana júgirip oınap júrgen bala tyshqan sańylaýdan qyltıyp shyǵa bergende, mysyq bas salypty. Balasynyń mysyqtyń qolyna túskenin bilgen ata tyshqan:

— Myseke, balamdy jiberińiz. Erteń osy ýaqytta sizge syılyq berip, apa-qaryndastarym men barlyq bala-shaǵamdy sizdiń úıge jibergeli otyrmyn, — depti.

— Ras aıtasyńba? Mıaý, — deıdi mysyq.

— Ras aıtam, myseke, shıq, shıq, — deıdi tyshqan.

— Mysyq: «Sózderińde turyńdar», — dep, aýzynasha bergende-aq bala tyshqan zyp berip taqtaıdyń jaryǵyna kirip ketipti. Balasyn qutqarǵan tyshqandar:

Qaranıe tana mysyq
Júrgen qaımaq urlap iship,
Endi bizden shyqpaıdy eshkim,
Otyr solaı tisiń qyshyp.
Shıq, shıq! — dep ánge basady.

Mysyqtyń ury, ári jalqaýlyǵynan, tyshqandardyń erkinsinýinen mezi bolǵan úı ıesi báriniń de kózin joǵaltypty. Óıtkeni olar urlyqpen kúnin kórip júrgen jalqaýlar edi.

---