InfoHub Logo

Bul týraly Sputnik habarlaıdy.

Almatyda jergilikti búdjetti únemdeýdiń arqasynda áleýmettik jaǵdaıy tómen, sondaı-aq búdjettik jáne áleýmettik salada qyzmet etetinderge syıaqy beriledi, — dep habarlaıdy Almaty ákimi Baýyrjan Baıbek seısenbi kúni “Nur Otan” partıasynyń qalalyq fılıalymen ótken konferensıa barysynda.

Onyń aıtýynsha, qalalyq búdjetti ońtaılandyrýdyń nátıjesinde dárigerlerge, muǵalimderge, tárbıeshilerge, áleýmettik jumysshylar men áleýmettik jaǵdaıy tómen turǵyndarǵa syıaqy berý múmkindigi týdy. 2016 jyly jergilikti búdjetten 123 mıllıard teńge únemdelgen: jol aınalymdaryn ońtaılandyrýǵa, qurylys nysandary men Ýnıversıadaǵa bólingen qarajattan 60 mıllıard teńge, áleýmettik nysandarǵa bólingen qarajattan 56,5 mıllıard teńge únemdelse, memlekettik satyp-alýlar kezinde 6,5 mıllıard teńge únemdelgen.

“Osyny eskere otyryp, memleket basshysynyń tikeleı tapsyrysymen Qazaqstan Respýblıkasy Táýelsizdiginiń 25 jyldyǵyna oraı jergilikti búdjettegi qarajattan áleýmettik jáne búdjettik salada jumys isteıtin almatylyqtarǵa bir alatyn aılyǵynyń kóleminde syıaqy berilse, áleýmettik jaǵdaıy tómen turǵyndardyń árqaısysyna 50 myń teńge kóleminde syıaqy beriledi”, — delingen baspasóz konferensıasynyń qorytyndysy boıynsha taratylǵan habarlamada.

Jalpy, syıaqy alatyn almatylyqtardyń sany shamamen 114,3 myń eken. Al bólinet qarajat 6,2 mıllıard teńge bolyp tur. “Memleket basshysy men partıa kóshbasshysynyń mereke qarsańynda kórsetip otyrǵan kómegi olarǵa birinshi qajettiliktegi taýarlardy satyp alýyna, azyq-túlik ónimderin alyp, komýnaldyq qyzmetterin tólep, nesıelerin óteýge kómektesedi dep senemin. Iaǵnı, eń qajetti dúnıelerine jarata alady dep senemin”, — dep keltiredi Baıbektiń sózin baspasóz qyzmeti.