InfoHub Logo

QR Bilim jáne ǵylym mınıstri Erlan Saǵadıevtyń aıtýynsha, búginde memlekettik granttardyń sanyn jergilikti búdjetterdiń esebinen kóbeıtý bastamasyn ákimdikterdiń ózderi qoldap otyr, dep QazAqparat xabarlaıdy.

«Jastardy bilimmen keńinen qamtyp, olardyń shetelge ketpeýin boldyrmaý maqsatynda bizdiń depýtattarymyz jergilikti búdjetterdiń esebinen qosymsha granttardy bólýdi usynǵan bolatyn. Ony búdjet kodeksi men bilim týraly zańǵa ózgerister engizý arqyly júzege asyrýǵa bolady. Biz óz kezegimizde atalǵan usynysty qoldaımyz. Ákimdikter de koldap otyr. «Atameken» ulttyq kásipkerler palatasy da, úkimettik emes uıymdar da ony qolǵa alý qajet dep sanaıdy. Qazirgi kezde Úkimettiń oń sheshimine arnalǵan qorytyndy qujat daıyn tur», - dedi E.Saǵadıev Mınıstrler kabınetiniń búgingi otyrysynda.

Aıta keteıik, bıyl respýblıkalyq búdjettiń esebinen 31 700 memlekettik grant bólingen bolatyn. «Sońǵy bes jyldyń ishinde jalpy granttardyń sany 31 myńnyń mańaıynda. Qazirgi kezde biz depýtattardyń qoldaýymen grant sanyn kóbeıtý joldaryn qarastyryp jatyrmyz. Sonyń birden-bir joly - jergilikti basqarýshy organdardyń esebinen grant sanyn ulǵaıtý. Árıne, bizdiń túlekter úshin ol úlken kómek bolady», - deıdi BǴM Joǵary jáne joǵary oqý ornynan keıingi bilim departamentiniń dırektory Darhan Ahmed-Zakı.

---