InfoHub Logo

Bir mujyq dalada júrip, birtúrli ádemi tas taýyp alyp, kórshisinen surady:

— Bul tasty neǵylsam bolady eken? — dep.

Kórshisi aıtty:

— Patshaǵa alyp bar, — dep.

Sonymen, mujyq kelip, patshanyń aldyndaǵy jasaýylynyń aıaǵyna jyǵylyp, meni patshaǵa jolyqtyr dep tilek etti.

— Ne jumysyń bar? — dedi olar.

— Patshaǵa syı alyp kelemin, — dedi mujyq.

Jasaýyl aıtty:

— Patsha saǵan ne syı berse, jartysyn maǵan ber, bolmasa jolyqtyrmaımyn.

Mujyq buǵan razy boldy.

Munan soń, mujyqty patshaǵa alyp kelisti. Patsha tasyn alyp, mujyqqa alda razy bolsyn aıtyp, myń teńge berip edi, mujyq aıaǵyna jyǵylyp:

— Taqsyr, myń teńgeni almaımyn, arqama elý shybyq saldyryńyz, — dedi

Patsha bir maǵynasy bar shyǵar dep, jasaýylyna buıyrdy: «aqyryn ǵana munyń arqasyna elý shybyq soq» dep. Jıyrma bes shybyǵyn soǵyp bolǵanda mujyq aıtty:

— Endi maǵan bolar, qalǵanyn bálen jasaýylǵa saldyryńyz, alǵan syıymnyń jartysyn ne de bolsa soǵan bermekshi edim.

Bul jasaýyldy shaqyrtyp, oǵan kelistirip jıyrma bes shybyq urdyrdy. Sonan soń, bul aılasyna razy bolyp, mujyqqa patsha eki
myń teńge bergizdi deıdi.

---