InfoHub Logo

QR İshki ister mınıstrligi Ákimshilik polısıa komıteti tóraǵasynyń orynbasary Renat Zulqaıyrov balalar men jasóspirimderdiń tárbıesine keri áser etip jatqan fılmder men serıaldardy atady.

«Qoǵamda jańa syn-qaterler men talaptar paıda bolyp jatqanyn moıyndaýymyz kerek. Eresekter negizinen aqsha tabýmen basy qatyp júrgende, bala tárbıesine ýaqyt qalmaıdy. Balalar táýlik boıy ınternetti, áleýmettik jelilerdi qarap otyrady. Munda eń tanymal kontent retinde birinshi orynǵa zorlyq-zombylyq, dórekilik pen túrli prankter shyǵyp otyr. Sonymen qatar, keıingi kezderi kámeletke tolmaǵandardyń minez-qulqyna «Chernyı dvor», «Pasanskaıa ıstorıa», «Taraz», «Slovo pasana» sıaqty tanymal fılmder keri áser etip jatyr», - dedi R. Zulqaıyrov Senatta kámeletke tolmaǵandardyń quqyqtary men zańdy múddeleriniń saqtalýyn qamtamasyz etý máselesin talqylaý kezinde.

Bul turǵyda ol polısıa qyzmetkerleri Oqý-aǵartý mınıstrligimen birlese otyryp, osy fılmder men serıaldardyń keıipkerlerin mysalǵa alyp, qylmystyq ómirdiń teris saldaryn túsindirip jatqanyn aıtty.

«Biraq bul is-sharalar jetkiliksiz. Jergilikti jerlerde ıdeologıa jetispeıdi, ekranda úlgi alatyn keıipkerler tapshy», – dep tolyqtyrdy Renat Zulqaıyrov.

Budan buryn habarlanǵandaı, Senatta kámeletke tolmaǵandardyń quqyqtary men zańdy múddeleriniń saqtalýyn qamtamasyz etý taqyrybyndaǵy jıynda depýtat Nurlan Beknazarov sot statısıkasy bala tárbıesine baılanysty máselelerdiń óte ózekti ekenin kórsetip otyrǵanyn aıtty.

---