InfoHub Logo

Meniń naǵashylarym Shanshar eliniń ádet-ǵurpyn eske alyp, mynadaı bir áńgime aıtty.

Qys aıy bolatyn. Kún shańǵytqan aıaz edi. Úsh salt atty adam Aqaıdyń Qaseniniń aýlynan qaıtyp kele jatyp, tórt úıden ǵana turatyn Shanshardyń az ǵana aýlyna kez boldyq. Kelgen qonaqqa tanyǵan-tanymaǵanyna qaramaı qonaqasy berip, syılaý qazaq eliniń ejelgi dástúri ǵoı. «Boı jylytyp alaıyq» dep oılap, attardyń aýyzdyǵyn alyp, shópke baılap, sálem berip, bir úıge kirip keldik.

Kelsek, bir qyz júkaıaqtyń ústinde jún tútip, jeńgesi syrmaqtyń ústinde urshyq ıirip otyr eken. Ekeýinen basqa úıde adam joq. Biz tórge shyǵyp jaılasyp otyrdyq. Qasymdaǵy jigitterdiń biri atqosshy bolatyn. Basynda jańadan tiktirgen, plúsh barqytpen tystalǵan qara eltiri
tymaǵy bar-dy. Basqa kıimderi jupyny edi. Ekinshi jigittiń aıaǵynda qonyshy uzyn jyltyr saptamasy bar-dy. Qaı úıge kelmesin qonyshyndaǵy kıizin alyp, túkirip-túkirip etiginiń qonyshyn jaltyratyp súrte bastaıtyn-dy. Yspalaıtyn da jatatyn-dy. Álgi jigit úıge kirip otyrysymen, óziniń sol daǵdyly kásibine kiristi.

Júkaıaqtyń ústinde otyrǵan qyz bárimizge kóz toqtatyp bir qarap aldy da:

— Jeńeshe, myna kisilerdiń jón-jobasyn surap, tanyspaısyz ba? — dedi jeńgesine burylyp.

— Jónderin suramaı-aq ózderi túsindirip jatqan joq pa? Taýdyń basynan etegine deıin túlki qýǵan tazy uqsap, úıge kirip úlgermeı-aq sándenip, aıaqtaryn jalap jatqan el arasynyń serileri emes pe? — dedi jeńgesi erinderin sylp etkizip.

— Meniń baıqaýymsha bul kisiler qaıyn jurtynyń aýlyna bara jatqan adamdarǵa uqsaıdy. Óıtkeni shetkerek otyrǵan aǵaı tym basynan jarasypty, — dedi qyz sózdi ilip áketip.

Ol eldiń syry erteden bizge málim ǵoı. Bizdi ermek jasap kúlkige aınaldyra bastaǵanyn sezdim de:

— Qaraqtarym, bizdiń jáıimizdi aıtqyzbaı-aq bilgenderińdi túsinip otyrmyz. Biraq, endi, alys jolǵa ketip bara jatqan adamdar edik. Asyǵyspyz. Bizge arnap et aspańdar. Ashshy qýyrdaq pen bir shaı ázirleı qoıyńdar, — dedim men. Úıdiń ıesi:

— Qaqsap-zarlap aıtatynyn aıtty ǵoı, oryndamasaq bolmas, — dep ornynan turdy [jeńgesi]. Onyń sońynan qyz da ketti. Taǵy qaı jerimizden min tabady bular dep kúdiktenip, bergen shaılaryn qysyla-qysyla iship, asyǵys attandyq álgi úıden.

---