InfoHub Logo

Aýylda, bolysta qyzylbórik bolyp isteıtin áperbaqan bir shabarman aýylǵa jıi kelip, kezdesken adamdardyń bárin jazyqsyz jazǵyryp, eldiń mazasyn ala beripti. Sol aýylda birimen-biri qatty oınaıtyn eki qurdas adam bolsa kerek. Bireýi ekinshi qurdasyn alystan nusqap:

— Myna kele jatqan adam patshany da, bolysty da tanyǵysy kelmeıtin, eldi olarǵa qarsy úgitteıtin aram peıildi adam, — dep tanystyrypty qyzyl bórikke. Qyzylbórik eki kózi qantalap, eki alaqanyna kezek túkirip, kijine bastapty oǵan.

Ekinshi qurdasy kelip sálem bergen kezde:

— Sen patshany da, bolysty da tanymaıtyn kórinesiń ǵoı, — dep qyzylbórik murtyn shikireıtip, kózin ejireıte bastapty.

— Kórmesem, ol kisilerdi men qalaı tanımyn? — depti ekinshi qurdas.

— Kórsetemin men saǵan kórmegendi, tanymaǵandy. Qol-aıaǵyńdy kisendep, barsa-kelmeske attandyramyn men seni, — dep aýzy kópirip, gúr-gúr etip, aýyldy basyna kóteripti álgi qyzylbórik. Kópke deıin basylmaı daýlap sóıleı beripti.

Esik aldynda shaı qoıyp júrgen bir jas áıel bolystyń shabarmanynyń kóp sóıleýge bet alǵanyn túsinip, bir aıaq qymyz ákelip usynypty.

— Aǵataı, ol kisige bosqa ursa bermeńizshi. Ol kisi ózińizdiń kúshigińiz bolady, — depti.

Qyzylbórik óziniń aqymaq bolǵanyn sonda túsinip:

— Ákeńniń, — dep shaǵystyrǵan alǵashqy qurdasqa qamshysyn ala umtylypty. Estip turǵan el kúlkiden ishekteri túıilip, óle jazdapty.

---