InfoHub Logo

Nan qaıdan shyǵady?
Bir kúni tyshqan nan dúkenine kirdi. Sórede jańa pisken sap - sary bólkeler úıilip tur eken. Pisken nan ıisine qyzyqqan tyshqan tumsyǵyn jybyr - jybyr tartty. Tómendegi bir bólkeni kemire bastady. Osy kezde kúzetshi kelip qaldy.
Tyshqan zyp berip, tysqa atyp shyqty. Biraq alysqa uzamady. «Apyraı, qaıdan shyqty eken osynshama nan. Bilip alyp shyqqan jerine, kirsem, á!» - dep qyzyǵyp ketti. Tesikten saqtana syǵalady.
- Nan, nan, sen qaıdan shyqtyń? – dedi sybyrlap.
- Satýshydan sura, - dedi nan.
Tyshqan satýshyǵa keldi.
- Satýshy, satýshy, nan qaıdan shyǵady?
- Naýbaıshydan sura, - dedi satýshy.
Tyshqan tympyńdap naýbaıhanaǵa keldi. Munda kóp adam nan pisirip jatyr eken.
- Nan qaıdan shyǵady? – dedi bir naýbaıshyǵa kelip.
- Dıirmenshiden sura, - dedi Naýbaıshy.
Tyshqan dıirmenshige keldi. Dıirmen tasy tynymsyz shyr-kóbelek aınalady. Eki adam un tartyp tur. Un tógilip aqqan bulaqsha quıylyp jatyr. Kózdi ashyp - jumǵansha qap - qap un daıyn boldy. Tyshqan ıneniń kózindeı tanaýyn tyrjıtyp, tańdana, qarap turdy da:
- Dıirmenshi, dıirmenshi, nan qaıdan shyǵady? – dep surady.
- Kombaınshydan sura, - dedi qyrmanshy qart.
Tyshqan dalada egin oryp júrgen kombaınshyǵa keldi. Qalyń egin teńizdeı tolqıdy. Kombaın toqtar emes, ilgerilep barady. Sabanyn bir bólek, topanyn bir bólek shyǵaryp tastaıdy. Torsyqtaı aq bıdaıdy astaýyna quıyp alyp barady. Tyshqan shińkildep:
- Kombaınshy, kombaıynshy, nan qaıdan shyǵady? – dep surady.
Kóktemde, traktorshy jer jyrtyp, seıalkashy tuqym sebedi. Eginshiler ony kútip baptaıdy. Kóp eńbek sińiredi. Mine, mynaý qalyń astyq – sol kóp eńbektiń jemisi. Nan eńbek arqyly tabylady, - dedi kombaınshy.
- Oı, munyń – azap qoı. Men shalqaıyp jatyp - aq nan taba beremin, - dep qýtyń - qýtyń etti tyshqan.
- Áne, mysyq kele jatyr! – dedi kombaınshy.
Sol - aq eken, tyshqan bir eski inge zyp berdi.

Ertegiler eline saıahat, ertegiler jınaǵy