InfoHub Logo

Ertede bir kempir-shal qyzymen elden bezip, ań jortpas, qus ushpas bir qula dalany mekendep ómir ótkizipti. Olardyń kúnkórisi jalǵyz nary eken. Jyldarda bir jyl qýańshylyq júrip, dalanyń shóbi qýraǵandyqtan, bir úıli ǵariptiń, betine qarap otyrǵan narynyń botasy ólip, nar júdep-jadap, sýalyp ketipti. Úrkerdeı úsh jannyń talshyǵy quryp, taǵdyryna qaýip tónip, qasiret-qaıǵyda qalypty. Bir kúnderi bir shal
men bir jigit osy araǵa paıda bolǵan eken. Júrginshiler bulardyń muń-zaryn uqqan soń, álgi shal janyndaǵy jigit arqyly kempir-shalǵa: «Eger qarymjyǵa qyzyn berse, qazir qara nardy dombyramen ıitip berem!» degen eken.

Bul sóz sorly kempir-shaldyń qaıǵysyn aýyrlata túsipti. Qyzdaryn beısaýat bireýge qolynan jetelete salǵanǵa shydamapty. Zerdeli qyz áke-sheshesiniń oıyn ańǵaryp:

— Taǵdyr basqa salsa, maqulmyn, — dep shalǵa kúı sherttirgen eken. Úı ishinen bebeýlegen kúı únin estigen daladaǵy qara nar ornynan turypty. Qyz ydys-aıaq jaqtaǵy shelekti ala júrip, shalǵa lesip kelgen jigitke ym qaǵady. Ol tysqa shyqsa, qara nar ras ıigen eken. Qyz nardyń qos emshegin tas qyp qysyp turyp, ere shyqqan jigitke óz júrek syryn janarynan tókken jaspen ańǵartyp, ózine kómek surapty. Shalǵa qor bolyp bara jatqanyna qorlanyp, jalyn atqan júregi ózine úmit artyp turǵanyn ańǵarǵan jigit shapshań basyp úıge kiredi de, shyn
júregi ózi dep turǵan qyz kóńiliniń kilti bolǵan zarly, muńly bir kúıdi shertedi. Sonda qyz shelegine sút bulaq bolyp aǵady. Qyzdyń kóz jasy da toqtaýsyz sorǵalaıdy. Osy kezde kempir-shal da rıza bolyp qyzyn jigitke atap, aq batasyn bergen eken. «Nar ıdirgen» sondaǵy jigit shertken kúı deıdi.

 

---