InfoHub Logo

«Jumyspen qamtý jol kartasy» boıynsha eńbek kúshi tapshy aýdandarǵa 20 myńǵa jýyq adam kóshirildi.  Búgin Aqordada ótken  Úkimettiń keńeıtilgen otyrysynda Elbasy Nursultan Nazarbaev osylaı dedi.

«Eńbek utqyrlyǵy boıynsha  jumys berýshi men jumysshylarǵa birin-bir tabýǵa kómektesý  qajet. Osyǵan baılanysty biz «Serpin» degen jobany iske asyryp jatyrmyz ǵoı. Ol halyq tyǵyz turatyn óńirlerdiń jastaryna bilim berip, olardy  kadr tapshy aımaqtarǵa jumysqa ornalastyrýǵa  múmkindik beredi. Qazirdiń ózinde mendegi bar derekterge sáıkes 12,5 myń jas maman oqý oryndarynda daıyndalyp jatyr. Munan ózge 20 myńdaı adam «Jumyspen qamtý jol kartasy» boıynsha eńbek kúshi tapshy aýdandarǵa kóshirildi»,-  dedi Elbasy.

Memleket basshysy soltústikte de, batysta da, shyǵysta da jumys kúshi az óńirler bar ekendigin, al ońtústikte jumys tappaı bos júrgen jastar kóp ekenin basa aıtty. Sonymen qatar Elbasy Densaýlyq saqtaý jáne áleýmettik damý mınıstri Tamara Dúısenovadan búgingi kúni soltústik óńirge qansha adam kóshkenin surady.

«Bul baǵdarlama aıasynda bıyldyń ózinde 329 otbasyn Ońtústik Qazaqstannan Soltústik, Shyǵys Qazaqstan oblystaryna kóshirdik. Onyń ishinde Soltústik Qazaqstan oblysy men Ońtústik Qazaqstan oblysy  ákimdikteri arasynda óte tyǵyz baılanys ornatylyp, jumys júrgizilýde. Al jastardy Bilim mınıstrligi qosymsha jiberip jatyr. Soltústik Qazaqstannyń ózine bıyl 3 myń adam oqýǵa jiberildi. Biz «Jumyspen qamtý» baǵdarlamasy arqyly qarajatyn berip jatyrmyz. Al Bilim mınıstrligi jastardy jiberýde», - dedi T.Dúısenova.

Osy oraıda QR Prezıdenti soltústiktegi kásiptik-tehnıkalyq oqý oryndarynyń úshten bir bos turǵanyn qaperge saldy. «Sol jerde 1-1,5 jyldyń ishinde oqytý kerek. Bul tegin ǵoı.  Biz birinshi tehnıkalyq bilimdi tegin beremiz dep jarıaladyq», - dedi Memleket basshysy jáne  Soltústik Qazaqstan oblysynyń ákimi Erik Sultanovtan ońtústik otbasylaryn soltústikke kóshirý jumystary jaıynda surady.«Jospar boıynsha 101 otbasy edi. Biraq 111 otbasy kóship keldi. Al endi Ońtústik Qazaqstanǵa  kóship kelýge nıet tanytyp otyrǵan 700 otbasy bar. Jalpy, munyń óńirge oń yqpaly bar ekendigin atap ótkim keledi. Biz alǵash ret jabylyp qalǵan mektepti qaıta ashtyq.  Mektepter jabyla bastaǵan edi, endi kóship kelgen otbasylardyń arqasynda qaıta asha bastadyq», - dep jaýap berdi  oblys ákimi.

---