InfoHub Logo

Búgin QR Prezıdenti Nursultan Nazarbaevqa Enseı ýnıversıtetiniń fılosofıa ǵylymdarynyń qurmetti doktory ataǵy berildi. Ǵylymı ataq dıplomyn atalǵan ýnıversıtettiń rektory Kım Eng  Hak saltanatty jaǵdaıda tabys etti, dep habarlaıdy QazAqparat.

«Búgin Qazaqstan Respýblıkasynyń Prezıdenti, Uly mártebeli Nursultan Ábishuly Nazarbaevqa Enseı ýnıversıtetiniń qurmetti doktory ataǵyn berý bizder úshin zor mártebe. Men ýnıversıtet rektory retinde bilim, ǵylym salasyndaǵy álemniń jetekshi oqý oryndarymen tyǵyz yntymaqtastyqty ár ýaqytta negizgi basymdyq retinde qoıyp kelemin. Al Qazaqstan bolsa bizdiń koreılik kompanıalar eń kóp jumys isteıtin elderdiń biri sanalady. Olar ǵylym, medısınadan bastap, barlyq derlik salada jumys isteıdi», - dedi ol.

Onyń sózine qaraǵanda,  Enseı ýnıversıteti 2003 jyly Qaraǵandy memlekettik ýnıversıtetimen yntymaqtastyqty jolǵa qoıǵan. Al búginde Qazaqstannyń túrli ýnıversıtetterimen yntymaqtastyǵyn keńeıte túsken ári ony aldaǵy ýaqytta da eseleı túsýge nıetti.

«Uly mártebeli Nursultan Nazarbaev «qyrǵı-qabaq» soǵystyń nyshanyna aınalǵan ıadrolyq qarýdan bas tartyp, óz elin zor ekonomıkalyq jetistikke jeteledi. Buǵan qosa, Nazarbaev eldiń mádenı alýan túrliligin damytýǵa da aıryqsha úlesin qosyp keledi», - dedi ýnıversıtet basshysy.

Sóz sońynda ol  Qazaqstan Prezıdentiniń aıryqsha eńbekterin joǵary baǵalaıtyndyǵyn atap ótip, osyǵan oraı ýnıversıtettiń qurmetti ǵylym doktory ataǵyn berýge sheshim qabyldaǵandyǵyn aıtty.

---