InfoHub Logo

Erterekte Nurpeıis degen qart bolypty. Ózi aýqatty turypty. Jasy toqsannan asyp, qartaıyp, jasy kelgen shaǵynda sóz reti kelgende balalary men jaqyn týystaryna, aýyldastaryna:

— Ólsem, janazama alty bolys el shaqyryńdar, — dep otyrady eken. Onyń bul habary kórshi aýyldyń qarttarynyń qulaǵyna tıipti. Olar aýyl ádetinshe qarttan «sybaǵa» kútip júripti.

Osyny biletin bir qý jigit qańtardyń sýyq kúninde kórshi aýyldyń ústinen ótip bara jatyp, bir shalǵa:

— Nurpeıis qaıtys boldy. Erteń janazasy, — depti. Álgi shal astyndaǵy atyn borbaılata shaýyp, aýlyna jetipti. «Nurpeıis ólse, janazasyna birge baramyz» dep júrgen eki-úsh kórshisine aıtypty. Bári bas qosyp, «taǵy kimge habarlaımyz» dep aqyldasypty.

— Oıbaı-aý, adamdy kóbeıte berip neń bar, kópten ne tıedi, ózimiz-aq baramyz, — depti bireýi.

Bular bir uıyqtap turyp, tún ortasynda jolǵa shyǵypty. Jol boıy Nurpeıistiń kıimin bólisipti.

— Nurpekeńniń qara barqytpen tystalǵan bir qasqyr ishigi bar deýshi edi. Jýǵysyna túsip, sony men alaıyn, — depti biri.

— Meniń shapanym bútin, biraq kebis, másim jyrtylyp júr edi, aıaq kıimin men-aq alaıyn, — depti ekinshisi.

Osyndaı dáme etip, bólisýmen túni boıy júrip, olar kún shyǵa Nurpeıis aýylyna jaqyndapty. Saqal-murtyn qyraý basyp kele jatqan bularǵa bir atty jolyǵypty.

— Jol bolsyn, — depti atty.

— Áleı bolsyn. Nurpeıistiń janazasyna kelemiz.

Atty ańyrap turyp qalypty da, sálden soń:

— Nurpekeń jańa ǵana atyna minip, bazarǵa ketti ǵoı, — depti.

Álgilerdiń basynan tas túskendeı bolypty. Aqyry qol-aıaq, qulaqtaryn úsitip, araǵa bir qonyp, olar úılerine zorǵa jetipti.

---