InfoHub Logo

Erte zamanda bir ógizdi úsh adam baqqan eken. Bireýi ógizdiń basynda jem, sý berip turady eken. Ekinshisi ógizdiń orta búıir, qabyrǵa tusynda turyp ógizdiń ash-toqtyǵyn búıirine qarap, ony sylap-sıpap aıalap turady eken. Úshinshisi — ógizdiń art jaǵynda turyp túrli nájisterin tazalap kútip turady eken. Sóıtip júrgende bir kúni ógizderi sımeı, tezek tastamaı qalypty. Sonda artyndaǵy adam, buǵan ne boldy eken, bileıin dep, ortadaǵy adamǵa kelý úshin jolda úsh aı júripti. Odan keıip ekeýi keńesip, muny tamaqqa jaqyn basynan bileıik dep, basyna deıin úsh aı júripti. Sonda basyndaǵy adam: «Ógiz aýyrdy, alty aıdan beri shóp jemeıdi, sý ishpeıdi», — depti. Bular endi ne qylamyz dep keńesip otyrǵanda, aspannan bir qara qus ushyp kelip ógizdi ilip ala jónelipti. Bul qus taýǵa baryp qonsa, taý kótere al maı oıylyp kulaı bastapty. Qus ógizdi qaıtadan alyp ushyp, bir báıterektiń basyna qonǵan eken, o da kótere almaı, sytyrlap syna bastapty. Qus ógizin alyp odan da ushyp, mıdaı dalada jaıylyp júrgen bir tekeniń múıizine qonǵan eken, ony teke shybyn qonǵan qurly kórmeı mańqıyp tura beripti. Qus ógizdi julmalap jeı bastapty. Sol kezde osy tekeni ańdyp jatqan bir mergen bar eken, qus ógizdiń jaýyrynyn bytyrlatyp, kútirletip tas-talqanyn shyǵaryp, etin jep jaýrynyn silkip laqtyryp tastaǵanda ańdyp jatqan mergenniń kózine tıipti. Mergen kózime shóp tústi dep jaýyryndy laqtyryp jiberipti. Sol kúni alystan jol júrip kele jatqan bir kerýen jolda jaýyn jaýyp, jer saz, jol aýyr bolyp, kesh bolyp ketken soń sol jerge qonǵan eken. Túnde jer silkingendeı, ne aınalǵandaı bolypty. Kerýender qorqyp, pirlerine sıynysyp jatqan- da tań ata bastapty, kerýenderdiń jer qozǵaldy dep júrgeni, manaǵy mergen laqtyrǵan jaýyryndy túnde tamaq ańdyǵan bir túlki jeıin dep qozǵap aınaldyrǵan eken. Tań atqan soń qarasa, kerýenderdiń basy kún shyǵysqa qarap qalypty. Tań aǵaryp atarda kerýenniń qastarynan bir taýdaı zat jyljyp uzaı bastapty. Kerýenderdiń bir ıti bar eken, manaǵy jyljyp bara jatqan zatty tarpa bas salyp, ústine minip alypty, kerýender kelse, adam aıtqysyz zor túlki eken. Kerýender jıylyp, sybanyp soıýǵa kiriskende, bir jaǵyn soıyp, bir jaǵyn aýdaryp soıýǵa shamalary kelmepti. Kerýender túlkiniń terisin úlkenderine baılapty. Bul kisiniń jańa týǵan balasy bar eken, túlkiniń terisin sol balaǵa kıim qylaıyn dese, tumaq túgil bórik te shyqpaı qalypty.

---