InfoHub Logo

Bir kúni Qojanasyrdyń úıine qonaq kelip qalady. Qojanasyrdyń úıinde kishkene ǵana qazan bar eken. Bul kishkene qazanǵa pisirgen as qonaqtaryna jetpeıtin bolady. SondyqtanQojanasyr kórshiles otyrǵan baıdyń úlken qazanyn suraıdy. Baı qazanyn bergisi kelmeı, qıpaqtaıdy. Qojanasyr ólerdegi sózin aıtyp, qazandy zorǵa surap alady. Tamaqtaryn iship, qonaǵyn jóneltip bolǵan soń, Qojanasyr baıdyń qazanyn alyp barady.

Baı turyp:

— Ýa, Qoja, qazanymdy syndyrǵan joqpysyń? — dep suraıdy.

— Joq, taqsyr, qazanyńyz synǵan joq, qaıta balalady! — deıdi Qoja.

— Ne aıtyp tursyń? Qazan balalaı ma eken? — deıdi baı.

— Senbeseńiz, kelip kórińiz! Mine, qazanyńyzdyń balasy, — dep Qojanasyr baıdyń qazanynyń ishinen bir kishkene qazandy alyp kórsetti.

Bul Qojanasyrdyń: «Baı ne aıtar eken?» — dep ádeıi ákelgen óz qazany edi. Biraq «kishkene qazanymdy ózime qaıtaryp berer» dep oılaǵan edi ol. Qolyna túsken oljadan baı tegin aırylar ma?

— Ýa, Qoja, raqmet, saý bol! Kerek bolsa, qazandy taǵy da alyp turýyńa bolady, — deıdi baı kóńildenip. Bir qazany ekeý bolǵan soń kóńildenbeı qaıtsin?! Qoja qazansyz qalady. Biraq amal ne? Ákelgen ózi. Qazanyn tastaıdy da, Qojanasyr úıine qaıtady. «Bul baı ıtke bir nárse isteıin», — dep oılaıdy Qojanasyr úıden shyǵa bere jatyp.

Biraz ýaqyt ótken soń Qojanasyr álgi baıdyń qazanyn taǵyda suraı keledi.

— Alyńyz, alyńyz, Qojeke! — deıdi qazany qazan taýyp, dánigip qalǵan baı. «Bul joly da Qojanasyr qazanymnyń ishine bir nárse salyp ákeler», — dep oılaıdy arany ashylǵan baı.

Qoja baıdyń qazanyn qaıtarmaı qoıady. Bir kún ótedi, eki kún ótedi, úshinshi kúni baı qazanyn ózi izdep keledi.

— Baıeke, aıypqa buıyra kórmeńiz! Qazanyńyz eki kún aýyryp, búgin óldi. Qazir ózim baryp sizge eskertip, kóńil aıtqaly otyr edim, — deıdi Qojanasyr qynjylyp. Baı ashýlanyp, bulqan-talqan bolady.

— Aqymaq! Ne aıtyp otyrsyń? Qazan óle me eken? Tez taýyp ber! — dep aqyrady.

— Baıeke, sókpeńiz! Týa bilgen qazan óle de biledi. Men aqymaq emes, sen óziń aqymaqsyń! — deıdi. Baı sózden jyǵylyp, úıine qaıtyp ketipti.

---