Ólim shyqqan aýylǵa
Oıbaılap qazaq shabady.
Ótirik jylap kóz jasyn
Qaıdan da bolsa tabady.

Qaraly qatyn, qyzdary
Daýys qyp ánge salady.
Taıaq ustap erkekter
Búkshıip tura qalady.

Epti jigit entelep,
Túsirip attan jetelep,
Bata oqyrshy baýyrymdap,
Erkekterge barady.

Kezekpe-kezek kórisip,
Kóziniń jasyn tógisip,
Kóńil aıtyp berisip,
Azar tynym alady.

Oıbaılap shabý maqul ma?
Jylasa da jaqynǵa,
Qazaqtyń mundaı ádeti
Tipti teris aqylǵa.

Aıańdap-aq júrseshi,
Baqyrmaı úıge kirseshi.
Jyly júrek shyn sózben,
Kóńil aıtyp kórseshi.

Bir kúni sondaı aýylǵa
Úsheý shaýyp kelse eger,
Taıaq ustap erkegi
Daıyndala berse eger.

Úsheýi bolsa qalpaqty,
Ony kózi kórse eger,
Amandaspaı eshkimge,
Surlanyp úıge kirse eger.

«Oıbaı, orys keldi!» – dep,
Balalar qashyp ketse eger.
«Bir ústel tap jyldam!» – dep,
Bireýi ámir etse eger.

Aýylatkom bir ýákil,
Biri bolsa komsomol,
Qaǵaz alyp jalma-jan
Jazyp jatsa protokol.

«Bular – jýan, myqty» dep,
«Qarý alyp shyqty» dep,
Tizip alyp ketpekshi
Bolsa olardy qolma-qol.

«Qaraly aýyl edik» dep,
«Taıaq ustap keldik» dep,
«Bata oqyrshy edik» dep,
Jalynyp azar uqtyrsa ol.

Shaı menen et asylsa,
Qant-baýyrsaq shashylsa,
Ashý, aptyq basylsa,
Sóz aıaǵy bolsa sol.

Neden boldy bul jumys?
Orynsyz ádet, qylǵan is,
Ulyqsyp asqan bos shabys,
Ekeýi de teris jol.

Bul ádetti tastańyz,
Týra jolǵa bastańyz.
Ulyǵymsyp aspańyz,
El túzeýge epti bol.

Chınovnık isin qylmańyz,
Ádilet jolyn tyńdańyz,
Qorqytyp eldi qoısańyz,
Tez túzelip, jyldam tol!

---