InfoHub Logo

Ómirden óz ornyńdy taba bil! (tárbıe saǵaty)
Maqsaty: oqýshylarǵa mamandyqtyń túrleri, olardyń adam ómirindegi mańyzy týraly túsinik bere otyryp, óz beıimine sáıkes mamandyq tańdaı bilýine yqpal jasaý; oqýshylardyń qoǵamǵa degen azamattyq pozısıasyn qalyptastyra otyryp, otansúıgishtikke tárbıeleý, kásibı baǵdar berý; túrli jattyǵýlar arqyly tanym prosesterin damytý, óz pikirin erkin aıtyp, ózgeniń pikirin syılaı bilýge, júıeli oılaýǵa baýlý.
Kórnekiligi: ınteraktıvti taqta, slaıdtar
Ádisi: trenıńter, áńgimeleý, suraq-jaýap, toptyq jumys

Barysy
İ. Kirispe.
Uıymdastyrý kezeńi. Sálemdesý, oqýshylardy sabaqqa daıyndaý.
İİ. Negizgi bólim
1. Trenıń. «Seniń jaqsy qasıetiń»
Bir-birimizge tek qana jaqsy qasıetterimizdi aıtaıyq. Sharty: bir sóz ekinshi qaıtalanbaýy tıis.
Mysaly:- Aıjan, sen ádemisiń
- Rahmet. Aıdos, sen ónerlisiń. t. s. s.

2. Taqyrypqa kirispe.
Slaıdpen Abaıdyń bir shýmaq óleńi kórsetiledi, dybyspen oqylady.
Ásempaz bolma árnege,
Ónerpaz bolsań, arqalan.
Sen de bir kirpish dúnıege,
Ketigin tap ta, bar qalan.
(A Qunanbaev)

3. Suraq-jaýap.
Uly aqyn Abaı Qunanbaev osy óleńi arqyly bizge qandaı oı tastap tur? Adamnyń ómirden óz ornyn taba bilýi degendi qalaı túsinesińder?
Muǵalim: Olaı bolsa, búgingi sabaǵymyzda qandaı taqyrypty qozǵaımyz dep oılaısyńdar? Árıne, biz mamandyqtar týraly sóz qozǵaımyz.
Taqyryby: «Ómirden óz ornyńdy taba bil!» dep atalady.
Sabaǵymyzdyń maqsaty: mamandyqtyń túrleri, olardyń adam ómirindegi mańyzy týraly túsinik bere otyryp, óz beıimine sáıkes mamandyq tańdaı bilý; qoǵamǵa degen azamattyq pozısıa qalyptastyra otyryp, otansúıgishtikke tárbıeleý, kásibı baǵdar berý; túrli jattyǵýlar arqyly tanym prosester damytý, óz pikirin erkin aıtyp, ózgeniń pikirin syılaı bilýge, júıeli oılaýǵa baýlý.
(Dápterlerine kún reti men taqyrypty jazdyrý)

4. Muǵalim: Ár adam erte me, kesh pe óz ómirinde «Qandaı mamandyq ıesi bolamyn?» degen suraqqa jaýap izdeıdi. Mamandyq tańdaý – óte jaýapty is. Óıtkeni, tańdaǵan mamandyǵyń erteńgi seniń ómiriń, bolashaǵyń, qoǵamnyń bolashaǵy, eldiń erteńi.
Mamandyq – bul kásibı odaq, ıaǵnı qarapaıym ómir súrý kózi bolyp tabylatyn jáne qandaı da bir daıyndyqty, jaýapkershilikti talap etetin eńbek qyzmetiniń mańyzdy bóligi.
Mamandyqtyń qansha túri bar dep oılaısyńdar?
Oqýshy jaýaby. Amerıkandyq kásipter sózdiginiń málimetteri boıynsha 22 qyzmet salasy boıynsha 114 topqa bólingen 40 myńǵa jýyq mamandyq túri bar eken. Statısterdiń zertteýi boıynsha jyl saıyn 25 mln adam óziniń jumys ornyn aýystyryp, onyń 12%- y qaıtadan óz ornyna qaıtyp oralady eken. Qazaqstanda osy mamandyqtardyń 300-ge jýyq túri kezdesedi. Bizdiń óz aýylymyzdyń ózinde 50-ge jýyq túri kezdesetinin zerttedim.
Muǵalim: «Adam óziniń yńǵaıymen, erkimen qyzmet etetin zat. İshten týǵannan-aq, belgili bir ónerge, qyzmetke ıkemdi bolyp týady. Basqasha aıtqanda, ár adamda bir nárse – talap, yńǵaı, qabilet, ıaǵnı zerektik bolady. Bireýi bala oqytýǵa, bireýi ákim bolýǵa, bireýi dárigerlikke berilýge, bireýi saýdaǵa, bireýi sózge yńǵaılanyp jaralady. Keıde kim ózine bitken yńǵaıyna qaraı óz jolymen júrip qyzmet etse, óz basyna, áleýmetke de kóp paıda keltirmek»- degen Júsipbek Aımaýytovtyń muraly sózi áli kúnge mańyzyn joıǵan joq.

Qyzylorda oblysy, Jańaqorǵan aýdany,
№54 J. Qydyrov atyndaǵy orta mekteptiń
orys tili men ádebıeti páni muǵalimi Rzaeva Asem