InfoHub Logo

 «Almaty qalasynyń Kólik Holdıńi» JSHS jolaýshylardyń «OŃAI» kólik kartasynan aqsha joǵalyp jatqandyǵy týraly shaǵymdaryna jaýap berdi.

«OŃAI» kartasynda aqsha joǵalyp jatqandyǵy týraly shaǵymdanǵan jolaýshylar boıynsha shyn mánisinde mynadaı jaǵdaı oryn alǵan. Olar qoǵamdyq kólikke kirgende kartalarynda aqsha bolmaǵan. Biraq sol kartalary arqyly jol aqysyn nesıege tóleýge qol jetkizgen. Kelesi joly kartadaǵy teńgerimin tolyqtyrǵan sátte, ótken joly paıdalanǵan nesıesi avtomatty túrde ótelgen. Iaǵnı, aqsha joǵalǵan joq, kerisinshe nesıesi jabylǵan», - dep habarlaıdy «Almaty qalasynyń Kólik Holdıńi» JSHS baspasóz qyzmeti.

Bul jerde «Almaty qalasynyń Kólik Holdıńi» JSHS óziniń baılanys ortalyǵyna myna telefon nómiri arqyly habarlasýǵa bolatyndyǵyn jetkizdi: 397 01 91. Sóıtip, jol aqysynyń tólengen ýaqyttaryn, baǵdardyń nómiri jáne basqa da málimetterdi alýǵa bolady. 

«Jolaýshyǵa jol aqysyn nesıege tóleýge bolady. Mysaly, jolaýshy kartanyń balansyn 200 teńgege tolyqtyryp, qoǵamdyq kólikterde 2 ret tóleıtin bolsa,  kartasynda 40 teńge qalady. Al, jol aqysy - 80 teńge. Kartasynyń teńgerimin tolyqtyrýdy umytyp ketip, úshinshi ret tólegisi kelse, tranzaksıa jasalady, ıaǵnı 40 teńge jáne avtomatty túrde nesıege taǵy 40 teńge tólenedi. Kelesi joly karta teńgerimi tolyqtyrylǵan kezde 40 teńge avtomatty túrde óteledi. Ýaqyt óte kele jolaýshylar kartadaǵy óz aqshalaryn baqylaýdy jáne josparly túrde jumsaýdy úırengen soń, kóp másele sheshiledi», - dep túsindirilgen «Almaty qalasynyń Kólik Holdıńi» JSHS málimdemesinde.

Aıta ketelik, «Almaty qalasynyń Kólik Holdıńi» JSHS TMD aýmaǵynda tuńǵysh ret elektrondy bılettendirý júıesinde onlaın tehnologıasyn qoldanyp otyr. Al onlaın rejiminde jolaýshylar legi, jol aqysyn tóleý, jolaýshylardyń sany, karta teńgeriminde jatqan aqshanyń kólemi týraly málimetterdi alyp otyrýǵa múmkindik beredi.

Onlaın tehnologıa vırtýaldy túrde aqsha urlanýdan barynsha qorǵalǵan. Sondyqtan, «OŃAI» kartasynan aqsha urlaý múmkin emes.

---