Ońtústik Koreıadan aktrısa men rejıser urlatyp alǵan Kım Chen Ir

Urlanǵan kınojuldyzdar

Kım Chen Ir kınony úgit-nasıhattyń eń qaýqarly quraly ári ónerdiń eń úzdigi dep bildi. Ol shartaraptan ákelip, jeke ózi úshin ana tiline aýdarylǵan fılmderdiń qısapsyz mol koleksıasyn jınady. 1966 jyly KHDR patshasy Kım Ir Sen óziniń 25 jasar balasy Kım Chen Irdi kıno jáne óner bólimshesiniń basshysy etip taǵaıyndady. Osylaısha jas kınoman qasıetti de qasterli salaǵa bas suqty.

^{Kım Chen Ir}

Ol soltústikkoreıalyq áskerı jáne saıası qaıratkerler, sol zamanǵy KHDR-ǵy jurttyń baqytty ómiri men olardyń jaýlarynyń jan ashyrlyq jaǵdaıy baıandalatyn úgit-nasıhat kınolardy túsirýge kiristi.

Alaıda, belgili bir úlgi boıynsha jáne bári birkelki somdalǵan keıipkerlerden tez arada-aq jalyǵyp ketken Kım Chen Ir gollıvýddyq týyndylarmen salystyrýǵa tatyrlyq naǵyz kıno túsirgisi keldi. Bulaı isteý úshin oǵan ondaı kınony qalaı túsirýdi biletin adamdardy qaramaǵyna alý kerek boldy. Óner qaıratkerlerin shaqyrý KHDR ádetinde joq bolatyn, sondyqtan olardy jaı ǵana urlap ákete salýdy uıǵardy.

1978 jyly ońtústikkoreıalyq aktrısa Chhve Yn Hı aıaq asty ǵaıyp boldy — kórgenderdiń aıtýynsha ony kólikke salyp alyp ketken. Alty aıdan soń ol aktrısanyń burynǵy kúıeýi — áıgili rejıser Shın San Ok ta qolǵa tústi, ol burynǵy jubaıyn izdeýge shyqqan edi.

Úgit-nasıhat jáne «Godzıllanyń» komýnıstik nusqasy

Burynǵy erli-zaıyptylardy KHDR-ǵa alyp keldi. Bas kezinde olar bir birinen bólek turdy. Rejıser tutqynnan qashyp ketýge talpynyp kórdi, biraq kınoman Kım Chen Irden ketip qalý ońaı sharýa emes edi. Aktrısa bolsa, ózin aqyldyraq ustady — ozbyr lıdermen kıno jaıynda áńgimelesip, meıramhanalarda tamaqtanyp júrdi. Ol myltyq atýdy jáne qorqynyshty fılmderdi jaqsy kóretin bolyp shyqty. Aktrısalardyń ishinen oǵan basqalardan kóbirek unaıtyny Elızabet Teılor boldy, al erler ishinde — Shon Konnerı somdaǵan Djeıms Bond unady.

Men odan azdap qorqatynmyn, alaıda, ol sezgishteý kisi eken. Odan seskenetinimdi baıqaǵanda «Chhe joldas, nege dir-dir etip tursyz? Shynymen-aq qortyqtan qorqasyz ba?» dep surap kóńilimdi ornyna túsirdi. Osydan soń kúlip jiberdi, onyń kúlkisi áserli boldy, ózine degen ıronıasy myqty bolatyn. — Chhve Yn Hı

Birneshe jyldan soń erli-zaıyptylarǵa kezdesýge múmkindik berildi. Kóp ótpeı olar úılendi. Sosyn Soltústik Koreıa úshin kıno túsire bastady — aldaǵy úsh jyl ishinde bul jup jeti fılm shyǵardy, olardyń ishinde «Púlsagarı» degen ataýmen japondyq «Godzıllanyń» káristik analogy da bar.

Altyn tordan qashyp shyǵý

KHDR-da Shın men Chhve tez arada tanymal juldyzdarǵa aınalyp shyǵa keldi. Olarǵa arnap úlken úı salyp berdi, as-aýqattan kende qylmady, qymbat syılyqtar: kosmetıka, avtokólikter, saǵattar ákep berip otyrdy. Aktrısa óz otany men kóz jazyp qalǵan jora-joldastaryn saǵynyp júrdi, Shınniń kóńili toq edi — keıingi jyldary onyń óz otanyndaǵy qyzmet-mansaby onsha jaqsy emes edi, al myna jerde ol kýmır boldy.

^{Shın San Ok, Kım Chen Ir jáne Chhve Yn Hı.}

Kóp keshikpeı jubaılarǵa shetelge saıahattap shyǵýǵa ruqsat etildi. Alaıda, KHDR bıligi saqtanýdy jón kórdi — erli-zaıyptylarmen, qashan bolsyn, oqqaǵarlar birge júrdi, olardyń tólqujattaryn qoldaryna ustatpady. Bir kúni olar Venaǵa jol tartty jáne sol jerde qashyp ketýge bel býdy. Olar qyraǵy qaraýyldardan aılasyn asyryp, Amerıka elshiligine jetip tyǵyldy.

Olar AQSH-qa baryp, KHDR jaıynda bar bilgenderin jaıyp saldy. Osy úshin olardy qorǵaý baǵdarlamasyna engizip, oıdan shyǵarylǵan atpen Disney stýdıasyna jumysqa turǵyzdy. Namysy taptalǵan Kım Chen Ir olardy eliniń jadynan óshirýdi uıǵaryp, olardyń esimderin barlyq soltústikkoreıalyq fılmderden alyp tastaýdy buıyrdy.