InfoHub Logo

Keshe OQO ákimi Janseıit Túımebaev Fransıanyń Qazaqstandaǵy Tótenshe jáne ókiletti Elshisi Fransıs Eten bastap kelgen bir top delegattarmen kezdesti, dep habarlaıdy OQO ákiminiń baspasóz qyzmeti.

Óńir basshysy sheteldik qonaqtarǵa Ońtústik Qazaqstan oblysynyń ınvestısıalyq múmkindikteri men aýyl sharýashylyq salasyndaǵy jetistikterin jáne týrızm baǵytyndaǵy jumystardy málimdedi.

Ońtústik Qazaqstan oblysy Qazaqstandaǵy halqy kóp shoǵyrlanǵan aımaq ekenin aıtqan ol keler jyly Shymkent qalasynyń halqy 1 mıllıonǵa jetetinin málimdedi. Sonymen qatar, oblysta iri ýran óndirýshi kásiporyndar men munaı óńdeý zaýyty bar ekenin jáne oblys kókónis pen jemis klasteriniń ortalyǵy bolyp tabylatynyn jetkizdi. Tashkentpen shekaralas jatqan aýdandarda qaýyn-qarbyz ósirilip, shetelge,  onyń ishinde, Germanıaǵa eksporttalyp otyrǵanyn aıtty.

Sondaı-aq, ındýstrıa salasyn damytýda oblys respýblıkada kósh bastaıtynyn xabarlaǵan ákim óńirde búginde 7 ındýstrıaldy jáne 1 arnaıy ekonomıkalyq aımaqtyń jumys istep turǵanyn atap ótip, onda jeńil jáne aýyr ónerkásip oryndary men toqyma fabrıkalary sátti jumys istep jatqanyn málimdedi.

Óz kezeginde Elshi   Qazaqstan men Fransıa arasyndaǵy qarym-qatynas jyl saıyn damyp keletinin aıtyp, týrızm, ındýstrıa jáne bilim baǵyttarynda áriptestik ornatýǵa daıyn ekenin jetkizdi. Sondaı-aq, mártebeli meıman Ońtústik Qazaqstanda birlesken jobalardy júzege asyrý úshin tyǵyz baılanys ornatý maqsatynda Fransıadaǵy túrli sala mamandarynyń ókilderimen arnaıy kelgenin jetkizdi.

Kezdesý barysynda  Fransıs Eten Qazaqstan Fransıamen qarym-qatynasty odan ári nyǵaıtý maqsatynda barlyq jaǵdaıdy jasap otyrǵanyn, ıaǵnı buǵan deıin vıza uzaqtyǵy 15 kún bolsa, keler jyldyń 1 qańtarynan bastap 30 kúnge uzartylatynyn málimdedi. Sonymen qatar,  ol Fransıaǵa qysqa ýaqytqa kelýshi qazaqstandyqtar úshin  vızasyz múmkindikter qarastyrylyp jatqanyn jetkizdi.

Jıyn sońynda óńir basshysy Qazaqstan men Fransıa kúnderine baılanysty sol eldiń ónerpazdary men kásipkerlerin Ońtústik Qazaqstan oblysynda kórgisi keletinin jáne osy kúnder aıasynda fransýzdyq taýaróndirýshilerdiń kórmesin uıymdastyrýdy usyndy. Sondaı-aq, ákim mektep pen joǵary oqý oryndarynyń muǵalimderin atalǵan elge tájirıbe almasýǵa jiberý jaıyn qarastyratynyn aıtty.

Jumys sapary eki kúnge jalǵasatyn fransıalyq delegattarǵa oblystyń ınvestısıalyq múmkindikteri tanystyrylyp, birqatar týrıstik jáne tarıhı oryndarǵa ınfotýr uıymdastyrylady dep josparlanýda.

---