InfoHub Logo

Óńirge jumys saparymen kelgen «Halyqaralyq baǵdarlamalar ortalyǵy» AQ prezıdenti Ǵanı Nyǵymetov M.Ótemisov atyndaǵy Batys Qazaqstan memlekettik ýnıversıtetinde bolyp, «Bolashaq» baǵdarlamasyna engizilgen ózgeristermen tanystyrdy.

Jıynǵa qatysqan Batys Qazaqstan oblysynyń ákimi Altaı Kólginovtiń atap ótkenindeı, Elbasymyz Nursultan Nazarbaev budan jıyrma úsh jyl buryn el bolashaǵy - jastardyń álemdik deńgeıde bilim alýy úshin «Bolashaq» halyqaralyq baǵdarlamasyn engizgen bolatyn. Sodan beri 12 myńnan astam adamǵa stıpendıa berilip, shetelderde oqyp kelgen 9 myńǵa jýyq maman qazirgi kezde Qazaqstanda eńbek etýde. Sonyń ishinde 135 túlek Batys Qazaqstan oblysynda qyzmet atqarýda. Memleket basshysynyń «100 naqty qadam» Ult josparyn júzege asyrý aıasynda qazirgideı daǵdarys jaǵdaıynda el aldynda turǵan mindetterdi atqara alatyn, álemdik talaptarǵa saı keletin kásibı mamandardy daıarlaý júıesin qurýdy tapsyrǵany belgili. Bul rette «Bolashaq» baǵdarlamasy JOO bitirgen túlekterge tyń jol ashady.

 Kezdesýde sóz alǵan Ǵanı Nyǵymetovtiń aıtýynsha, «Bolashaq» stıpendıasynyń 2016-2020 jyldarǵa arnalǵan jańa damý jospary Elbasynyń «100 naqty qadam» Ult josparyna sáıkes jasaldy.  Budan bylaı «Bolashaq» úmitkerlerine qoıylatyn talap qatańdatyldy. Eger 2014 jyldyń ózinde úmitkerler úshin aǵylshyn tili boıynsha talap (IELTS) 3.00-den 4.00 balǵa joǵarylaǵan bolsa, bıyl barlyq kvotalyq sanattar úshin 5.00-ge deıin jetkizilip otyr. Aldaǵy ýaqytta aǵylshyn tilin meńgerý deńgeıi dúnıe júzindegi jetekshi JOO-lardyń qabyldaý talaptaryna deıin kóterilmek.

«Shyǵyndy ońtaılandyrý jáne tildik oqytý tıimdiligin arttyrý baǵytynda 2015 jyldan bastap kvotalyq sanattaǵy stıpendıattardy 6 aılyq tildik daıyndaý Nazarbaev ýnıversıteti men ál-Farabı atyndaǵy Qaz-UÝ-da júrgiziledi. Sodan keıin aǵylshyn tilin alty aı boıy shetelde oqıdy.  2016 jyldan barlyq sanattaǵy «Bolashaq» úmitkerleri úshin jumys ótili joǵarylatyldy. Atap aıtqanda, akademıalyq baǵdarlamalarǵa túsetinder úshin keminde eki jyl, al taǵylymdamadan ótetinder úshin 12 aılyq mamandaný kezeńin qosqanda, úsh jyl jumys ótili bolýy tıis. Sondaı-aq tehnıkalyq mamandyqtar mártebesin arttyrý aıasynda 2016 jyldan bastap «Magıstr dárejesin alýǵa ınjenerlik-tehnıkalyq qyzmetkerler» jańa sanaty engizildi, bul sanat boıynsha óndiristik sektorda kem degende eki jyldyq qyzmet tájirıbesi bar mamandar oqytylady. Osy oraıda bul múmkindikterdi batysqazaqstandyqtar da paıdalanyp, ásirese, ınjenerlik-tehnıkalyq kadrlar qataryn anaǵurlym kóbeıte alady», dedi Ǵ.Nyǵymetov.

QR Bilim jáne ǵylym mınıstriniń buıryǵyna sáıkes QR Prezıdentiniń «Bolashaq» halyqaralyq stıpendıasyn taǵaıyndaý konkýrsyna qatysý úshin qujattardy qabyldaýdyń úshinshi qorytyndy kezeńi bıylǵy 30 qyrkúıekte aıaqtalady. «Bolashaq» baǵdarlamasynyń resmı ákimshisi - «Halyqaralyq baǵdarlamalar ortalyǵy» AQ stıpendıaǵa úmitker Qazaqstan azamattarynan qujattardy qabyldaýda. Úmitkerler qujattardy elektrondy úkimet veb-portaly, «Aza­mattar úshin úkimet» memleket­tik korporasıasy arqyly (burynǵy HQO) nemese óz qolymen «Halyq­aralyq baǵdarlamalar ortalyǵy» AQ-qa tapsyrýǵa bolady. Ótken jylǵy konkýrstyq irikteý táji­rıbesi boıynsha bıyldan bas­tap qujattar tapsyrý talaptary jeńil­detildi. Baǵdarlamany damytýdyń 2016-2020 jyldarǵa arnalǵan josparyna sáıkes stıpen­dıa «Magıstratýra», «Doktoran­týra», «Rezıdentýra» jáne «Ta­ǵy­­lymdamalar» boıynsha taǵa­ıyn­dalyp, olarǵa sanatyna qaraı jekelegen talaptar qoıylady.

Ǵ.Nyǵymetov óńirge sapary barysynda Ortalyq komýnıkasıalar qyzmetiniń óńirlik fılıalynda jýrnalıserge suhbat berip, sondaı-aq Nazarbaev zıatkerlik mektebinde boldy.

Aıta keteıik, qazirgi kezde BQO-dan shyqqan 45 stıpendıat shetelde bilim alýda.

Avtor: Eljan Eraly

---