InfoHub Logo

Bul týraly "Astana jastary" resýrstyq ortalyǵynda jastarmen kezdesý barysynda Otbasy bankiniń Basqarma tóraǵasy Lázzat Ibragımova aıtyp berdi.

İs-shara "Demografıalyq ósý – ulttyń básekelestik artyqshylyqtarynyń negizi" taqyrybynda Úkimet saǵatyn ótkizýge daıyndyq jumystary aıasynda ótýde. Sondyqtan búgin kezdesýge Qazaqstan Respýblıkasy Parlamenti Senatynyń depýtattary da qatysty. Kezdesý moderatory – Parlament Senatynyń depýtaty Nurtóre Júsip.

Ótken jyly Otbasy bank ("Báıterek" holdıńiniń enshiles uıymy) 35 jasqa deıingi 24 705 qazaqstandyqqa qonys toıyn atap ótýge kómektesti. Olarǵa turǵyn úı qurylys jınaq júıesi sheńberinde 414 mlrd teńge somasyna zaemdar berilgen. Negizinen jas qazaqstandyqtar bir nemese eki bólmeli páter satyp aldy. Mundaı turǵyn úıdiń ortasha quny 19,7 mln teńgege teń.

Banktiń statısıkasy boıynsha 18-35 jas aralyǵyndaǵy 1,3 mln qazaqstandyq baspanaǵa muqtaj.

Bul másele ásirese óńirler men monoqalalarda ótkir bolyp tur. Laıyqty jumys pen turǵyn úı jaǵdaılarynyń bolmaýyna baılanysty halyq iri qalalarǵa qonys aýdarady. Sońǵy 5 jylda bul úrdis kúsheıe tústi. Osyǵan baılanysty halyqtyń eń kóp ósýi Astana, Almaty, Shymkent qalalary men Aqtóbe oblysynda baıqalady.

Jastardy qoldaý jáne otbasynyń ishki kóshi-qonyn azaıtý úshin bank qalalar men oblystardyń ákimdikterimen birlesip, jastarǵa arnalǵan arnaıy turǵyn úı baǵdarlamasyn iske qosty.

Ol birinshi ret Almatyda 2017 jyly bastaldy. Sol kezde "Almaty jastary" baǵdarlamasy aıasynda alǵashqy 100 qatysýshy qonys toıyn atap ótti. Sodan keıin jobaǵa Astana jáne basqa da oblystar qosyldy. Jastar baǵdarlamasynyń arqasynda sońǵy 7 jyldyń ishinde búkil el boıynsha 5400 jas qazaqstandyq qonys toıyn atap ótýge múmkindik aldy. Otbasy bank jobany iske asyrýǵa 22,5 mlrd teńge, jergilikti ákimdikter 75,4 mlrd teńge bóldi. Jalpy eseptegende jastarǵa jeńildetilgen nesıe berý baǵdarlamasynyń búdjeti 98 mlrd teńgeni qurady.

Jastar baǵdarlamalary Almaty, Astana, Aqtóbe, Atyraý, Jambyl, Jetisý, Batys Qazaqstan, Qaraǵandy, Qostanaı, Qyzylorda, Mańǵystaý, Almaty, Abaı, Ulytaý jáne Pavlodar oblystarynda jumys istep tur.

Baǵdarlamaǵa Qazaqstannyń 35 jasqa deıingi kez kelgen azamaty qatysa alady. Eger biz otbasy týraly aıtatyn bolsaq, onda erli-zaıyptylardyń bireýi ǵana qatysa alady. Ótinim berý kezindegi resmı jumys ótili aımaqqa baılanysty 6 aıdan 12 aıǵa deıin bolýy kerek. Sonymen qatar, sońǵy 5 jyl ishinde adamnyń menshiginde jyljymaıtyn múlik bolmaýy tıis.

Bank satyp alynatyn turǵyn úı qunyn shektemeıdi, joǵarǵy shek tek qaryz somasyna ǵana belgilenedi. Aımaqqa baılanysty ol 10 mln teńgeden 20 mln teńgege deıin aýytqıdy. Eger tańdalǵan baspana qymbatyraq bolsa, onda baǵdarlama qatysýshysy qaryz somasy men turǵyn úı baǵasy arasyndaǵy aıyrmashylyqty óz esebinen tóleıdi.

Jastar baǵdarlamasy boıynsha bastapqy jarna - 10%, al paıyzdyq mólsherleme - jyldyq 5%-dan (JTSM - 5,2%-dan bastap) bastap. Ipotekanyń maksımaldy merzimi - 19 jylǵa deıin.

Sondaı-aq, jas qazaqstandyqtar turǵyn úılerdi baǵdarlamadan tys, naryqtyq sharttarmen satyp alý úshin Otbasy bankindegi depozıtterine belsendi túrde qarajat jınaıdy. Bank salymshylarynyń 30%-dan astamy – 35 jasqa deıingi jas qazaqstandyqtar. Olardyń eń únemshilderi Almaty, Astana jáne Shymkentte turady.

Bıylǵy jyly Otbasy bank Qazaqstandyq jastardy qoldaý jónindegi jobalardy iske asyrýyn jalǵastyrady.

Sondaı-aq, bul baǵyttaǵy jumysty tıimdi iske asyrý úshin bank oblys ákimdikterine jyl saıyn jáne turaqty túrde aýdan ortalyqtarynda, monoqalalarda jáne aýyldarda jastardy turǵyn úımen qamtamasyz etý úshin óńirlik búdjetke qarajat bólýdi aldyn ala qarastyrýdy usynady.

Búdjetten áleýmettik júktemeni azaıtyp, óńirlerde jumys isteıtin jastardy ustap qalý úshin Otbasy bank iri kásiporyndarǵa jyl saıyn "Korporatıvtik" ónim sheńberinde yntymaqtastyq múmkindigin usynady.

Statısıkaǵa súıensek, elimizdiń monoqalalarynda shtattyq qyzmetkerler sany 230 myńnan asatyn, olardyń qatarynda 35 jasqa deıingi jastary bar 47 iri kásiporyn jumys istep tur.  

- Biz jas qazaqstandyqtar men olardyń otbasylaryn qoldaý maqsatynda qosymsha "9-20" baǵdarlamasyn ázirledik. Ony naýryz aıynda iske qosýdy josparlap otyrmyz. Turǵyn úıdiń qoljetimdiligin baǵalaý kezinde qazir jastar úshin qaryz boıynsha syıaqy mólsherlemesinen góri bastapqy jarnanyń mólsheri mańyzdyraq. Eń bastysy, bul jas otbasy ómirindegi alǵashqy, birlesken menshik, birigip alǵan ortaq jyljymaıtyn múlik bolady, - dep atap ótti Otbasy bankiniń Basqarma tóraǵasy Lázzat Ibragımova.