InfoHub Logo

Qazaqstandaǵy Otbasy kúnine oraı ótkizgen «Otbasy – baqyt mekeni» atty Respýblıkalyq aptalyq aıasyndaǵy «Otbasy qundylyǵy – sarqylmas qazyna» taqyrybyndaǵy ashyq sharanyń baǵdarlamasy

Maqsaty: Otbasy músheleriniń arasyndaǵy baýyrmaldyq, qaıyrymdylyq qatynastaryn nyǵaıtý, ata – anasyn syılaı biletin azamat tárbıeleý, otbasy qundylyqtaryn arttyrý.
Kórnekiligi: foto stendiler, danalyq sózder, bezendirýler, slaıd, beınerolıkter.
İ júrgizýshi: Otbasy ónegesin alyp ósken urpaq bolashaǵyna zor senimmen qaraıdy.
İİ júrgizýshi: Adam balasy shyr etip dúnıe esigin ashqannan bastap sol ortaǵa beıimdelip, yqpalyna kónip er jetedi.
İ júrgizýshi: Mine, búgingi merekelik sharamyzdyń «Otbasy qundylyǵy – sarqylmas qazyna» dep atalýy da úlken maqtanysh.
İİ júrgizýshi: Balaǵa bilim, tárbıe berýde basty tulǵa – ustaz bolsa, ony jalǵastyrýshy, demeýshi ata – ana.
İ júrgizýshi: Árıne, ananyń ystyq aıaly alaqany, ákeniń asqar taýdaı bıik tulǵasyn, zerdeli oı – maqsatyn keıingi urpaqqa jalǵastyrý qandaı baqyt!
İİ júrgizýshi: Otbasy qundylyǵyn arttyrý, bergen tárbıesin boıymyzǵa darytý, jaqsy qasıetterin úlgi etý perzenttik paryzymyz emes pe?
İ júrgizýshi: Qadirli de qurmetti ata – analarymyz týraly júrekten shyqqan marjan jyrlaryn tartý etip, ulanǵaıyr sezim ıirimderin arqaý etip, jyrlaǵan aqyn jazýshylarymyz az emes.
Barshańyzdy otbasylar merekesimen quttyqtap, óz júreginen shyqqan «Otbasym – meniń baqytym» atty jyr týyndysyn ala kelgen 9 synyp oqýshysy Halılany sizderdiń qoshemetterińizben ortaǵa shaqyramyz.
(Óz óleńin oqıdy)
İİ júrgizýshi: Al endi oqýshylar! Otbasy, ata – ana, bala, ata – áje týraly maqal – mátelderdi eske túsirip, árkez olardy qasterlep júrý úshin trenıńke kezek bereıik. (Oqýshylar sheńber bolyp turyp, mýzyka yrǵaǵymen sıqyrly qorapty bir - birine usynady. Mýzyka toqtaǵanda qorapsha kimniń qolynda qalsa sol oqýshy otbasy týraly maqal aıtady.)
İ júrgizýshi: Dúnıede ne teń keler anaǵa,
Týǵan odan batyr, ǵalym, dana da.
Bar ómirin arnaıtuǵyn balaǵa,
Ata – anany jyrlamaqqa bola ma? – deı kele jalyndy jyr shýmaqtarymen kishkentaı búldirshinderimizdi ortaǵa shaqyramyz.
(Búldirshinder áke, ana, ata – áje týraly óleńder oqıdy. )
İİ júrgizýshi: O, ata – anam,
Taıanyshym, tiregim!
Bar baqytty bir basyńa tiledim.
Bizdi jaqsy bolsa eken dep qashanda
Lúpildeıdi seniń qamqor júregiń.
Kezekti oqýshylarǵa beremiz.
(oqýshylar óz otbasy týraly prezentasıa jasaıdy)
İ júrgizýshi: Otbasy – shaǵyn memleket, qoǵamnyń negizi bolyp tabylady. Óıtkeni memleketimizdiń damýyna órkendep ósip – ónýine úles qosatyn bolashaq negizi ár otbasynyń jemisi.
Olaı bolsa, otbasy týraly óz qundylyqtarymyzdy, oı – pikirimizdi «Shynyn aıtsam...» atty trenıń arqyly órbiteıik.
Men shynyn aıtsam... Otbasym – maǵan óte qymbat, óıtkeni biz meıirimdimiz.
Men shynyn aıtsam... Ata – anamdy árkez maqtan tutamyn, óıtkeni men olardyń bolashaǵymyn.
Men shynyn aıtsam...
Barshańyzdy merekemen quttyqtap 2 synyp oqýshylary bı ónerlerin kórsetedi.
İİ júrgizýshi: - Balalar, endi ár otbasynda kún ómir súredi dep kóz aldymyzǵa elesteteıik, osy kúnniń shýaǵy sónbes úshin otbasynda qandaı jaqsy qarym – qatynastar bolýy qajet dep oılaısyzdar?
(Balalar kún shýaqty dostyq meıirimdilik, syılastyq, jylylyq, qamqorlyq t. b. dep qurastyrady)
İ júrgizýshi: Qurmetti mereke qonaqtary, ustazdar, oqýshylar! Otbasy qundylyqtaryn árkez qurmetteıik, ár otbasynda súıispenshilik, tatýlyq, birlik bolsyn!