InfoHub Logo

Birde bes-alty jigit jolaýshylap kele jatyp, jolda bir úıge toqtaıdy. Úı ıesi olardy jaqsy qarsy alyp, attaryna jem salyp, ózderine et asady. Sodan anaý-mynaý sharýasyn jaıǵap kelgen soń ózi de asqa otyrady. Aspazshy onyń aldyna bir tegene sorpa ákep qoıady. Úı ıesi ony iship alyp, taǵy suraıdy. Sóıtip, ol bir ózi jıyrma adam ishetin tamaqty taýysyp jeıdi. Muny kórgen qonaqtar tań qalyp, mán-jaıyn suraıdy.

— Men de ózderiń sekildi, eldiń ishkenin iship, jegenin jeıtinmin. Biraq aldyma qaıtkende de baıýdy maqsat etip qoıǵan edim. Artyq aqsha shyǵarmaýǵa, artyq dúnıe shashpaýǵa tyrystym. Sol sarańdyǵymnan osyndaı bálege dýshar boldym ǵoı, — dep bastaıdy áńgimesin álgi
kisi, — sonymen ne kerek, kúnderdiń bir kúninde Vernyı qalasyna bardym. Meımandar toqtaıtyn jerge kelip, atymdy baıladym. Atyma jem-shóp alýǵa aqshamdy qımaı, qasyndaǵy attardyń jeminen alyp sala salýshy edim. Bul joly solaı eteıin dep, jan-jaǵyma qaradym. Ózge jylqylardan oqshaý turǵan, túr-túsi kelisken arǵymaqqa kózim tústi. Aldy tolǵan jem, ózi toıyp turǵan sıaqty. Aqyrdan eki ret jem aldym. Úshinshi ret taǵy almaqshy bolyp, qolymda sala bergenimde, aıǵyr qatty pysqyrynyp jiberdi. Sol mezette denem dir etip, titirkenip ketti. Erteńinde jolǵa shyqtym. Biraq ózimdi bir túrli jaman sezindim. Sodan bastap tamaǵym toımaıtyn boldy. Bar tapqan-taıanǵanym tamaǵyma ketip jatyr.

Keıinnen surastyryp bilsem, álgi jylqy Ótegen batyrdyń arǵymaǵy eken. «Ózi batyr, ózi baı, qaltasynan altyn aqshasy úzilmeıdi» dep estýshi edim. Endi odan aty úshin kek qaıtarýdy, sáti tússe altynyn tartyp alýdy oıladym. Sóıtip, jolyn ańdydym. Bir kúni qarasam, at
jekken arbamen kele jatyr eken. Ańdyp turyp, arbasyna qarǵyp mindim. Aı-shaıǵa qaramaı, tý syrtynan jabystym. Qolymdaǵy balǵamen bas-kóz demeı urǵylap jatyrmyn. Biraq ol bylq eter emes. Otyra qalyp tepkiledim, ony da shybyn shaqqan qurly kórmedi. Bir kezde meni jas baladaı kóterip aldy da, basymdy qoltyǵynyń astyna salyp qysyp jiberdi.

Saýdyrlap búkil tisim tústi de qaldy. Ol tisterimdi qolyma ustatty da: «Bala, oıynyń qandy ma? Ólgiń kelmese, endigári urlyq jasama!» — dep arbadan laqtyryp tastady. Aram dúnıege qyzyǵyp, Ótegen áýlıeniń jazasyna ushyraǵan beıbaqtaryń men bolam, — dep áńgimesin aıaqtaıdy úı ıesi.

---