InfoHub Logo

Abylaı han, Ótegen batyr Ulytaýdyń bókterinde ań aýlap júrip, bir saıǵa kelip az-kem aıaldap, demalýǵa otyrady. Qapysyz otyrǵan han men batyrdyń ústine jaýdyń qalyń qoly kezdeısoq tap bolyp, ekeýin qalmaqtar baılap áketedi. Qalmaqtyń hany ekeýin zyndanǵa salyp tastaıdy.

Ótegen men Abylaıdyń qolǵa túskenin estigen Tóle bı batyrlardy bastap, 30 myń qalmaqtyń ordasyn qamapty. Qalmaqtyń hany Qaldan Seren záre-quty qalmaı qorqyp: «Bı ashýlanbasyn, sóıleseıik, keliseıik», — dep kisisin jiberipti.

Tóle bı hannyń ordasyna kirip baryp:

— Eı, qalmaqtyń hany, jerimdi alǵanyńdy keshirip edim, malymdy alǵanyńdy keshirip edim. Endi batyrym men hanymdy alǵanyńdy keshirmespin! 30 myń qolmen ózim keldim, 30 myń qolmen Qoıkeldi keledi, 30 myń qolmen Naýryzbaı keledi, — deıdi.

Sonda qalmaqtyń hany burynǵysynan da qatty sasyp:

— Bıeke, bir bilmestik boldy, keshirińiz, — dep keshirim suraıdy. Ótegen men Abylaı ekeýin ózi baryp zyndannan shyǵaryp ákelgen eken. Ótegen men Abylaı oıda joq jerde Tóle bıdi kórgende tań qalyp:

— Qalaı keldińiz? — dep suraıdy.

Sonda Tóle bı:

— Úndemeńder, hanym, batyrym! Qalmaq, qalmaqty eptep almaq. Osylaı etsek jabyla, qalmaqtyń ózi-aq bizdiń jerden joǵalmaq, — degen eken.

Sóıtip, Tóle bıdiń «Qalmaq, qalmaqty eptep almaq» degen sózi elge tarap ketipti.

---