InfoHub Logo

- Óz úıime qaıtamyn! - dedi bala.

Aınala turǵandar balanyń sózine jamyraı kúlisti.

- Áı, óz úıińde ne bar?! - dedi kúlip osy jerde turǵan úlken apaılardyń biri balaǵa. - Ne bar óz úıińde?!

- Óz úıimde atam bar! - dedi bala.

- Atań degen otyrǵan joq pa munda?!

Jańaǵy apaı sákiniń ústinde otyrǵan balanyń naǵashy atasyn kórsetti.

Bala basyn shaıqady:

- Joq! Ol meniń atam emes. Óz úıimde ózimniń atam bar!

Aınala turǵan adamdar balanyń sózine taǵy da dýyldaı kúldi.

Jıeniniń sózine sákiniń ústinde otyrǵan kisi de kúldi:

- "Jıen el bolmaıdy" dep osydan aıtylǵan ǵoı. Ózimniń de uldarym úılener. Ózimniń de "atalap" júretin nemerelerim bolar.

- Áı, munda toı bolǵaly jatqan joq pa?! - dedi taǵy da jańaǵy apaı balaǵa. - Naǵashy ápkeńdi uzatqaly jatqan joqpyz ba? Tátti-páttilerdiń bári de osynda, kámpıttiń de nebir túri osy jerde. Kóńildi mýzyka oınalyp jatyr. Qyzyqtyń bári osy jerde emes pe?! Qazir qudalar keledi ápkeńdi uzatyp alyp ketýge. Qalmaısyń ba?!

Bala taǵy da basyn shaıqady:

- Joq! Óz úıime qaıtam!

Balanyń atasy syrqattanyp qalyp, qudasynyń toıyna kele almaı qalǵan edi. Bala aýylynan kisi ákelip tastaýǵa kelgen kóliktiń júrgizýshisin tanyp, "meni de ala ket" dep, kólikti toqtatyp qoıǵan bolatyn.

- Mama! - dedi bala endi óziniń anasyna qarap. - Maǵan kıimderimdi paketke jınap, salyp bershi! Men óz úıime qaıta bereıin! Al sen toıdy ótkizip baryp bir-aq kelersiń.

Úlkender balanyń sózine taǵy da kúldi.

- Osynyń bári áke-sheshemniń óziniń tárbıesi, - deıdi kúlip osy úıdiń taǵy bir boıjetkeni. - Áke-sheshem óz tárbıesiniń jemisin kórip jatyr.

Úlken ápkem turmysqa shyqqannan keıin, bir kúni úıge qydyryp keldi. Dastarqannyń basynda otyryp, bir áńgimeni bastaı berip edi, áke-sheshem tyıdy da tastady:

"Óz úıińniń áńgimesin osynda ákelip jetkizgenińniń aldy-arty osy bolsyn! Sen endi turmysqa shyqqan, óz úıiń bar qyzsyń! Turmysqa shyqqan qyzdyń óz úıiniń áńgimesi óz úıiniń ishinde qalýy tıis! Ol syrtqa shyqpaýy kerek!"

Ápkem tymyraıyp úndemeı qaldy.

Osyny estip otyrǵan ekinshi ápkem uzatylǵannan keıin óz úıine sińdi de ketti. Barǵan jerinde qadirli. Tipti óziniń úıin bizden artyq kóretindigi sondaı, bizge aıynda-jylynda bir keledi. Myna "óz úıim, óz úıim" dep taqyldap turǵan bala - sol ekinshi ápkemniń uly.

Bala kıimderi salynǵan qaltany baýyryna qysyp, qushaqtap alǵan kúıi ózin kútip turǵan kóliktiń artqy oryndyǵyna baryp otyrdy da, jınalǵan jurtqa qarap jymıyp kúldi.

Kólik aqyryn ornynan qozǵaldy. Ol óz úıine bara jatty.

- Osyndaı balalardan bolashaqta jaqsy azamat shyǵady! - dedi osy jerde turǵan mekteptiń dırektory. - Anyǵynda, Otan degen qasıetti uǵymnyń áý bastaǵy alǵashqy baspaldaǵynyń ózi balanyń óz úıinen, óziniń tamyrynan bastaý alyp jatady. Ol óziniń kishkene Otanyn kóńildi mýzykaǵa da, kámpıtke de aıyrbastamaı ketti.

---