InfoHub Logo

 

- Aıgúl ápke, múmkin men ólmeıtin shyǵarmyn??? -  basynda bir tal shashy joq , óńi bozaryp ketken bala osylaı dep ún qatty. Terisi tolyqtaı jasyl túske engen. Syrttaı fransýz fılmindegi Fantomasqa uqsaıdy, biraq kúlkili emes. Esh.

Jasy 60-tardan asyp ketken medbıke aýyr kúrsindi. Mundaıǵa úırený múmkin emes. Adam balasy mundaıǵa úırene almaıdy. Sebebi, ol adam balasy deıtin ataýǵa ıe.

- Ol ne degeniń?!!  Árıne, sen ólmeısiń.... - kózinen jas atqylap jatyr.

- Aıgúl ápke, túsinesiz be? Cenbi kúni -anamnyń týǵan kúni. Oǵan arnaıy syılyq daıyndap qoıdym... óz qolymmen...  eger, ólip qalsam, ony qalaı syılaımyn?  Senbi kúnine deıin ólmeı tursam bola ma? Ótinish?

Qaterli isik aýrýhanasy. Ólim men ómirdiń ortasynda arpalysqan jandardyń jatyn bólmesi. Bul balalarǵa ólim úkimi kesilip qoıylǵan. Buǵan qaramastan, tiri adam keıpine enýge tyrysady, tipti, keıbireýiniń sóıleýge  shamasy jetip jatyr. Árqaısysynyń sanaýly ómiri qaldy. Múmkin, bir apta nemese birneshe aı. 

Oǵan eshnárse qajet emes. Ony qutqarý tym kesh, ol tek anasynyń týǵan kúnin kórgisi keledi. Túrli-tústi qaǵazdan óz qolymen jasaǵan arzan syılyqty tartý etý úshin... Onyń ómirindegi eń qundy syılyq. O Jaratqan, balanyń beıbaq anasyna bul aýyr synnan ótýine járdem bere gór!  Esiniń aýysýyna jol bere kórme....

Al, bizde aıfondardyń túr-túrimen bar. Qaı úlgisi? Besinshisi nemese altynshysy?  Bizde - taza altynmen kómkerilgen jıhazdar. Bizde - kelemejdeý úshin, tońazytqyshqa ornatylǵan MR3-pleerler. Tipti, qazir kosmosqa ǵaryshkerler emes,saıahatshylar ushatyn bolǵan. Ǵylymnyń atasy men anasy qaltasy aqshaǵa toly baı-symaqtarǵa tik turyp, qyzmet etýde. Ásemdik salondarynan aıaq alyp júre almaısyń. Ájimdermen kúresýge arnalǵan zerthanalar qaptaýda. Biraq, qaterli isik, SPID sekildi aýrýlardyń aldyn alýǵa qaýqarsyz adam balasy.

... Al, balanyń baǵy bar eken. Kópten asyǵa kútken senbi kúnin qarsy aldy. Tek, bir aptadan soń ǵana, ómirmen qosh aıtysty.

 

---