InfoHub Logo

Abylaıdyń qoly osy Arqany boılap, qalmaqpen qýa soǵysyp kele jatqanda, bir ýaqyt qalmaqtar tásil jasapty. Bir tastyń úńgirine kirip, bekinip jatyp alyp, jasyrynyp qalady. Artynan qýyp kele jatqan Abylaı qoly «jaý qashty» dep beıǵam bolady. Sonda qalmaqtar úńgirden shyǵyp, Abylaıdyń qolyn tutqıyl shabýylmen qyrarman bolypty deıdi. Biraq jurt es jıyp, soǵysa bastaǵanda qazaq kóp bolǵandyqtan, qalmaqtar qaıta qashyp, úńgirge kirip alypty. Sonymen, bekinip jatyp sadaq atyp, Abylaıǵa alǵyzbaı qoıypty. Kóp adamy qyrylyp, ashynǵan Abylaı qoldaǵy batyrlaryna jar salypty: «Kimde-kim erlik etip, aılasyn taýyp, osy qalmaqty dál osy úńgirden shyǵarmaı qyryp beretin bolsa, budan bylaı qolbasylyq dárejeni únemi sol kisige buıyramyn!» — depti.

Sonda Abylaıǵa ergen kóp batyrlardyń ishinen úzdik shyqqan Qarakereı Qabanbaı bolǵan edi. Kúndiz-túni talaı urys salyp, úńgirdiń aýzyn oqpen kómip, qalmaqty tuqyrtyp otyryp, áldeneshe kún ashtyqtan turalatady. Sóıtip, artynan jeńistiń toıyn toılaǵanda, Abylaı Qabanbaıdy qasyna alyp otyryp:

— Bar batyrdan sen ozdyń, jeke dara shyǵyp, ozyp tursyń. Aıtqanym aıtqan, sertimnen shyqqanym osy! Qaıratyń úshin budan bylaıǵy joryqta udaıy qolbasy sen bolasyń jáne budan keıin seniń atyń Qabanbaı emes, «Daraboz» bolsyn! — depti.

Oqýǵa keńes beremiz:

Qabanbaıdyń batasy

Qabanbaı batyr

Qabannyń Altaı óńirinde kózge túsýi

---