InfoHub Logo

«El bolyp óleń jyrdyń taqyryby, qaýyshty aýylymen aqyn uly». Bul bir kezdegi mektep túlegi, eldiń perzenti, belgili qalamger, Jazýshylar odaǵynyń múshesi, aqyn Seıil Boranbaevpen Qojabaqy aýyldyq mádenıet Úıiniń sahnasynda ótken kezdesý keshiniń taqyryby edi. Bul kezdesý 2000 jyly aqyn Seıil Boranbaevtyń 70 jasqa tolý mereıtoıyna baılanysty ótkizilgen.

Belgili aqyndar Seıil Boranbaev, Ánes Narymbetov, Meshitbaı Quttyqovtar №25 mekteptiń bir kezgi túlekteri edi. Olar mekteptiń alǵashqy túlekteriniń qatarynan sanalady.

...Seıil, Ánes, Meshitbaı
jyrdaǵy shyqqan júırikter,
múshesi edi Odaqtyń
óleńde bolǵan daraly.
Kókiregi toly kómbege,
tarıhshy ustaz ári aqyn,
qurmet tutty ortasy
Aqanjan syndy aǵany.
Asyl sózdiń syrynan
shákirtke tálim úıretken
Faızolladaı aqyndar
Bolmysy bolǵan baǵaly.

Osy óleńde aıtylǵandaı, mekteptiń aldyńǵy býynyndaǵy túlekterdiń arasyndaǵy eleýli orny bar jandardyń biri – tarıhshy ustaz, aqyn, zertteýshi Aqanjan Kelimbetov, ádebıetshi ustaz, aqyn Faızolla Omarovtardyń esimderi de qurmetpen atalady. Bular da №25 mekteptiń bir kezgi túlekteri, qalam ıeleri, kópke belgili jandar boldy.

...Nurperzent pen Seksenbaı,
Jetiskendeı aqyndar
baspasóz atty maıdanda
qolynan túspedi qalamy.

Respýblıkalyq basylymdardyń jýrnalısi, aqyn Nurperzent Dombaı, belgili jýrnalıs Seksenbaı Kúlimbetov, aýdandyq baspasózde jaýapty qyzmetter atqarǵan aqyn, belgili jýrnalıs, «Qazaly válsi» ániniń óleńiniń avtory Jetisken Mákenaly, aýdandyq baspasózde uzaq jyldar qyzmet istegen jýrnalıs Raýshanbek Seıtenovter de №25 mekteptiń bir kezdegi shákirtteri, mektepten keıingi ómir jolda qalamdary qarymdy bolǵan túlekteri edi.

Belgili týyndy «Elimniń júregi – Astana» ániniń óleńiniń avtory Sarash Qońyrbaeva da jáne qurylysshy, kásipker, aqyn Nurbolat Beketaevtar da №25 mekteptiń bir kezgi túlekteri boldy.

Sonymen qatar aýyldaǵy qurylys salasynyń mamany, keıinnen Engels keńsharynyń kásipodaq komıtetiniń tóraǵasy bolǵan Jetkerbaı Ysqaqov ta talantty qalamger, aqyndardyń biri boldy. Al joǵary bilimdi mal dárigeri Qazybek Baımanov jazǵan ómirdiń san-salasyndaǵy kemshilikterdi synaıtyn syn-syqaqtar bir kezde aýyl klýbyndaǵy mádenı is-sharalarǵa qyzmet etse, óleńderi aýdandyq baspasózde jaryq kórip turdy.

Sonymen birge jergilikti aqyn Ámirhan Qanaev jyrlary aýdandyq baspasózde jaryq kórdi jáne taǵy bir talantty jan Medetbaı Túıebaevtyń óleńderi de aýdandyq baspasózde jarıalanyp turǵan edi.

Kóp shákirtke alǵashqy ustaz bolǵan Nuǵyman Ábdirazaqov aqyn kisi edi. 70-80 jyldardyń ishinde aýdandyq gazette ustaz óleńderi úzbeı jaryq kórip turdy.

80-jyldardyń ishinde aýdandyq gazetke maqalalary úzbeı jaryq kórip turatyn sol kezdiń kúni keshegi ǵana mektep túlekteri Lázzat Ońalbaeva jáne Tarǵyn Qanıevterdiń biri keıinnen ustaz bolyp qyzmet atqarsa, ekinshisi keıinnen aýdandyq gazettiń jýrnalısi bolyp qyzmet atqardy.

90-jyldardyń aıaq sheninde №25 mektepte Asqar Súleımenov atyndaǵy ádebıet úıirmesi, Barlybek Syrtanov atyndaǵy quqyqtaný úıirmesi jáne halyq aqyny Baınazar Ótepov atyndaǵy «Jas qalamger» úıirmeleri jumys istedi. Osy joldar avtorynyń jetekshiligimen jumys jasaǵan úıirmelerdiń eki úıirmege ortaq «Ar jáne Zań» jáne «Quqyq», «Jas qalamger» qabyrǵa gazetteri shyqty. Úıirme músheleri Nurgúl Sársenova, Mıra Lepesova, Gúldana Aıdarova, Bota Jalmaǵambetova, Aqnur Qýatbaeva, t.b. óleńderi qabyrǵa gazetterinde jaryq kórdi jáne aýyl sahnasynan oqyldy. Úıirme músheleriniń arasynda jyr músháırasy ótkizildi, úıirmeniń negizinde mektep oqýshylarynyń arasynan I mektepishilik «Án-dombyra» baıqaýy uıymdastyryldy. Oǵan Arandy aýylynan kelip oqıtyn jáne Qojabaqy mektebi oqýshylarynyń arasynan dombyramen án salatyn 17 oqýshy qatysty.

Seıildeı túlegi qanattanǵan, kópke belgili halyq aqyndarynyń izi qalǵan ólkeden qazirde jas daryndar túleýde. Mekteptiń keıingi býyn shákirtteri Dına Bókebaı, Aısulý Jetkergen jáne Raýshanbek Sharapat jyrlary baspasóz betinde keńinen jaryq kórip júr.

Tómende mekteptiń mektepti 1951 jyly bitirgen túlegi, belgili aqyn Meshitbaı Quttyqovtyń óz salasyna baılanysty jazylǵan bir óleńi usynylyp otyr.

Meshitbaı Quttyqov – Bozkól aýylynyń perzenti, Qojabaqy mektebiniń túlegi. Ádebıet fakúltetin bitirgen. İshki ister salasynda basshy qyzmetterde istegen. Óleń «Saqshy» gazetinen alyndy. Gazetke aqynnyń perzenti usynǵan.

Tynyshtyq saqshylary

Bir táýlik «stansıasyn tynyshtyqtyń»
Basqardym,
Telefonnan dybys kúttim.
Bir táýlik sharshadym men,
Kelistirip,
Arasyn qıanat pen durystyqtyń.

Beredi adassa da maǵan habar,
Beredi talassa da maǵan habar.
Kóńili maǵan aıtsa,
Jaı tabardaı,
Tárizdi tasqynnan da aman qalar.

Júgirem ádiletti shyraq qylyp,
Tyńdaımyn aısyz túnde qulaq túrip.
Bir sende oı-qıalym,
Bir sen úshin,
Kelemin men janymdy laqtyryp.

Taǵy da bir tań atty kóz aldymda,
Qıyny,
Qyzyǵy men óz aldyna.
Bastyqqa «tynyshtyq» dep baıandadym,
Men búgin elden buryn sóz aldymda.

Esigin tynyshtyqtyń aıqara ashyp,
Tańmenen araılanyp,
Turdym tasyp,
Azanǵy tútindi endi kórip turmyn,
Asyqqan adammenen dıdarlasyp.

---