InfoHub Logo

Qarjyny qasyqtap jınap júrip, shómishtep tógetin keıbir qandastarymyzdyń búgingi kúıi adam alańdatarlyq bolyp otyr. Ejelgi qaryzdy qoıyp, endigide bireýden surap alǵan aqshasyn «kredıt» deıtindi shyǵarypty. «Paıyzy az, beriletin merzimi uzaq» degen syltaýlar aıtqanda, sol kredıtti tegin alǵandaı bolady. Degenmen, kredıttiń ózin de aqshaǵa satyp alatynymyz aıdan anyq.

«Aqsha ómirdiń mańyzy emes, biraq barlyq mańyzdylar soǵan táýeldi» degen naqyl sóz qalaı dóp taýyp aıtylǵan. Búginde qarjynyń kúshimen sheshilmeıtin másele kemde-kem. Joq, aqshasy bardyń bári baqytty dep, aqshasy azdyń alqymynan alaıyn degen oı emes. Kerisinshe, toı-tomalaqqa talaı sommany quıǵansha, ysyraptan aýlaq bolyp, tıimdi joldarmen nege ózimizdi baıytpasqa?

1991 jyly Almatyda «Al-Baraka Qazaqstan» komersıalyq banki ashylyp, keıinnen «Bank Kaspııskıı» onyń murageri boldy. Atalmysh bank 2017 jyly qazirgi ýaqytta taptyrmas tendensıaǵa aınalǵan «Kaspi Gold» debettik kartasyn barlyq jeke tulǵalarǵa usynǵan bolatyn. Osy jyldan bastap adamdardyń arqasynan da, ámıan-qaltasynan da aýyr júk tústi. Bar qarajatyn qalaqtaı qatty kartaǵa salý Qazaqstan azamattary úshin yńǵaıly boldy.

Shynymen de, bul kartanyń kemshiliginen góri artyqshylyǵy basymdaý ekenine búgingi kúni kózimiz anyq jetti. Birinshiden, kartadan aqshany kez-kelgen bankomattan kez-kelgen ýaqytta 0%-dyq komısıamen sheship ala alasyz. Tıynyn sanap, túıe soıyp, eshki soıǵannan dámetetin adamdar úshin bul taptyrmas múmkindik! Bos bolǵan bes tıynyn sanap ábigerge túsetinderge Kaspi Gold Qudaıdan kelgen kádimgi syı dersiń.

Kartanyń sizden eshteńe dámetpeıtini bylaı tursyn, aıadaı alaqanyńyzǵa aqyńyzdy da sanap, salyp beredi. «Daýyl – quıynnan, aqsha – tıynnan» deıdi dana qazaq bul jaıly. Jasaǵan tólemińiz ben salǵan qarajatyńyz 1% keshbekpen ózińizge syı bolyp qaıta oralady. Qaıtyp kelgen qyz jaman, biraq qaıtyp kelgen aqsha kim-kimdi bolsyn qýantatyny ras.

Sonymen qatar, qolma-qol tólem jasaǵannan qaraǵanda, kartamen jasalǵan tólemder sizge belgili bir sommany únemdeýge kómektesedi. Stýdentter aqshasyn qajetsiz jumsap qoımaýy úshin de plasık kartany qoldanatyn kórinedi. Koko Shanel: «Men adamdardy aqshany ustaýlaryna qarap baǵalaımyn» degen bolatyn. Eger siz aqshany ońdy-soldy jaratýdyń sheberi bolsańyz, Kaspi Gold arnaıy siz úshin jasalǵan deýge de bolady.

Áıgili cheh pedagogy Ian Amos Komenskıı: «Qyzmettiń paıdaly bolýy ýaqytty utymdy qoldanýdan»,-dep ýaqyttyń mańyzdylyǵyna asa nazar aýdartqan bolatyn. Ýaqyt – emshi, ýaqyt – altyn, ýaqyt – sarapshy. Ásirese, adamdardyń qoly bosamaıtyn 21 ǵasyrda ýaqyttyń quny altynnan da qymbat bolyp tur. Mine, Kaspi Gold bul talapqa da ábden saı keledi. Karta alý úshin saǵattap saryla kútýdiń qajeti joq: keldińiz, qujatyńyzdy kórsettińiz, kameraǵa kúlip qaradyńyz – kartańyz daıyn. Qarajattyń qulypyn qolyńyzǵa qysyp, qaltańyzdaǵy qarjyny kartaǵa aýdaryp kete barasyz. Ǵajap emes pe?

Jańa ǵasyrda jańa tehnologıalardy qoldanyp, óz ómirimizdi barynsha jeńildetý – óte durys áreket. Degenmen, aqshanyń sońyna túsip, únemdeýdiń sheginen asyp ketpegen jón. «Telmirip alǵan teńgeden ter tógip tapqan teńge juǵymdy»,-dep beker aıtpasa kerek.

---