Bir qanshyrǵa aıtypty bódene kep:
Sen úshin qatty ýaıym qylamyn,– dep,–
Solańdaǵan baıǵusyń ushýǵa olaq,
Bir kúni ketedi ǵoı turymtaı jep?

Qanshyr aıtty:– Qaýpim joq turymtaıdan,
Shyqpaımyn qalyń qamys, qopa-saıdan.
Men sendeı jaltań jerge ottamaımyn,
Tyǵylǵan soń meni alyp jeıdi qaıdan?

Bódene aıtty: – Qamysyń tynys emes,
Bosqa aryqtap júrgeniń durys emes.
Aılamen-aq alǵyzbaı ketip júrmiz,
Turymtaıyń bizderge jumys emes.

Júz qubylyp, qýlanyp, jylpalaqtap,
Tańyrqatty qanshyrdy ózin maqtap:
«Tilimdi alsań, ekeýmiz dos bolaıyq,
Maǵan erseń, júreıin jaýdan saqtap».

Ańqaý sorly bir qýdan aldy sabaq,
Bódenemen dos qyldy qulqyn tamaq.
Jaý mindeti moınynda bódeneniń,
Ekeýi emin-erkin qyrda ottamaq.

Qyrańǵa shyǵyp alyp ottap júrdi,
Betegeli myrǵaıǵa ábden kirdi.
Teginde bódeneniń aıtqany ras,
Tarlaýǵa jaıylǵan soń shyn semirdi.

Bir qyrǵa shyǵyp edi ottaı-ottaı,
Byrqyrap kele jatyr bir turymtaı.
Bódene kóre salyp buǵa qoıyp,
Qanshyrǵa habar qyldy buq dep oıbaı.

Jalma-jan buǵa qaldy qanshyr batyr,
Jer edi panasyzdaý shópsiz taqyr.
Ekeýi tyrp etpesten jatsa-daǵy,
Turymtaı tupa-týra kele jatyr!

Bódene ár aılany kóp oılady,
Bir túrli sol arada ep oılady.
«Turymtaı sony kórip alyp ketsin,
Qanshyrdy ushyraıyn» –dep oılady:

Qoıypty bul turymtaı bizdi kórip,
Men qashsam, keter edim bir bult berip.
Sen erterek qashpasań qutylmaısyń,
Bul seni alyp jeıdi týra kelip.

Mendeı tarǵyl emessiń, barandaýsyń,
Qybyrlap, tynysh jatpaı alańdaısyń.
Erte ushyp bir qamysqa tyǵylyp baq,
Bul jerde jatyp aman qala almaısyń.

Ańdamaı aldaýǵa erip qanshyr ushty,
Turymtaı ony kórip tym qunysty.
Qanatynyń qaqqany kózge ilinbeı,
Adym jerge jibermeı qaǵyp tústi.

Bódene ushyp, jypyldap, ketti alysqa,
Dos bolyńyz osyndaı aldamyshqa.
Qasyndaǵy qanshyrdy qanǵa boıap,
Ózi baryp tyǵyldy bir qamysqa.

Qamysta jatyp aldy qylmaı qaýip,
Qutyldy dosyn berip, aıla taýyp.
Qonǵanyn bódeneniń kórgen bireý,
Júgirtip sol araǵa keldi shaýyp.

Bódene jatyr edi qybyr etpeı,
Qarap júr shyr aınalyp, kózi jetpeı.
At basyp bódeneni janshyp ketti,
Jazasyn o da tartty aman ketpeı.

Jigitter, osy sózge qulaǵyń sal,
Basyńda mıyń bolsa, muny uǵyp qal.
Aldy-artyn oılamaǵan ańqaý menen
Aldampaz aram dostan ǵıbrat al.

---