Jetelep sonaý jyldar qara shaldy,
Qarasazda júrýshi eń, qara shalǵy.
Qara shalǵy ishinde qart pen seniń,
Talaı-talaı kórip em tamashańdy.
Qalypsyń ǵoı qańyrap, qara shalǵy.
Túbeginen túk qoımaı Qarasýdyń,
Qart ekeýiń qanshama alasurdyń.
Qanshama ret qapyryq kún ótkerip,
Tún jamylyp, qanshama tań asyrdyń,
Kúrkede, jaǵasynda Qarasýdyń.
Oıdyń, qyrdyń shalǵyndy bókterinde,
Oıyn salmaı sen de endi ketkeniń be?
Bir jarq etip qalýshy eń aq almastaı,
Bir-bir janyp qum qaıraq ótkeninde
Sen-daǵy pensıaǵa ketkeniń be?!
Attandyryp kelmeske qara shaldy,
Qańyraǵan qorada qara shalǵy.
Uńǵysynan syryǵyn sýyryp ap,
Tamyzyqqa kelini jaǵa saldy.
Qala berdi tat basyp qara shalǵy...

---