Qarasha, jeltoqsan men sol bir-eki aı —
Qystyń basy biri erte, bireýi jáı.
Erte barsam jerimdi jep qoıam dep,
Yqtyrmamen kúzeýde otyrar baı.

Kedeıdiń ózi júrer maldy baǵyp,
Otyrýǵa otyn joq úzbeı jaǵyp.
Tońǵan ıin jylytyp, tonyn ılep,
Shekpen tiger qatyny búrseń qaǵyp.

Jas balaǵa ot ta joq turǵan mazdap,
Taltaıyp qaqtana almaı, óle jazdap.
Kempir-shaly bar bolsa, qandaı qıyn,
Bir jaǵynan qysqanda o da azynap.

Kári qoı eptep soıǵan baıdyń úıi,
Qaı jerinde kedeıdiń tursyn kúıi?
Qara qıdan orta qap uryspaı berse,
O da qylǵan kedeıge úlken syıy.

Qar jaýsa da, tońbaıdy baı balasy,
Úı jyly, kıiz tutqan aınalasy.
Baı ulyna jalshy uly jalynyshty,
Aǵyp júrip oınatar kózdiń jasy.

Baı úıine kire almas tura umtylyp,
Bala shyqsa asynan úzip-julyp,
Yq jaǵynan sol úıdiń uzap ketpes,
Úıgen júktiń kún jaǵyn oryn qylyp.

Ákesi men sheshesi balany ańdyr,
O da ózińdeı ıt bolsyn, azǵyr-azǵyr.
Asyn jóndep ishe almaı qysylady,
Qurbysynan uıalyp óńsheń jalbyr.

Jalshy úıine jany ashyp, as bermes baı,
Artyq qaıyr artyqsha qyzmetke oraı.
Baıda meıir, jalshyda peıil de joq,
Ańdystyrǵan ekeýin qudaıym-aı!

Alsa da aıanshaqtaý kedeı sorly,
Eńbek bilmes baıdyń da joq qoı orny.
Jas bala, kempir-shalyn tentiretpeı,
Bir qys saqta, tas bolma sen de o qurly.

---