Qartaıdyq, qaırat qaıtty, ulǵaıdy arman,
Shoshımyn keıingi jas balalardan.
Terin satpaı, telmirip, kózin satyp,
Tep-tegis jurttyń bári boldy alarman.

Baı alady kezinde kóp berem dep,
Jetpeı turǵan jerińde tek berem dep.
Bı men bolys alady kúshin satyp,
Men qazaqtan kegińdi ápperem dep.

Jarly alady qyzmetpen ótkerem dep,
Elýbasy shar salyp1, lep berem dep.
Jalańqaıa jat minez jaý alady,
Bermeı júrseń, men seni jek kórem dep.

Dos alady bermeseń bult berem dep,
Jaýyńa qosylýǵa sert berem dep,
Buzylǵan soń men ońaı tabylmaspyn,
Ne qylyp ońaılyqpen yryq berem dep.

Sum-surqıa – sumdyqpen ep berem dep,
Súıer jansyp, súıkimdi bet berem dep.
Júz qaraǵa eki júz alarman bar,
Bas qatar bas-aıaǵyn tekserem dep.

El jıyp, mal soıyńyz et berem dep,
Et bersem, sen mendik bol dep berem dep.
Qara qarǵa syqyldy shýlasar jurt,
Kim kóp berse, men soǵan sert berem dep.

Buzylarda oılamas bet kórem dep,
Ant ishýdi kim oılar dert kórem dep.
Qabaǵyn ıtshe óshigip shyǵa keler,
Men qapsam, bir jerińdi bókserem dep.

Orys aıtty ózińe erik berem dep,
Kimdi súıip saılasań, bek kórem dep.
Buzylmasa, oǵan el túzelgen joq,
Ulyq júr bul isińdi kek kórem dep.

Jurt júr ǵoı aramdyqty ep kórem dep,
Toqtaý aıtqan kisini shet kórem dep.
Bar ma eken jaı júrgen jan qanaǵatpen,
Qudaıdyń óz bergenin jep kórem dep?

Atany bala ańdıdy, aǵany – ini,
It qorlyq nemene eken súıtken kúni?
Aryn satqan mal úshin anturǵannyń
Aıtqan sózi qurysyn, shyqqan úni.

Alys-jaqyn qazaqtyń bári qańǵyp,
Aıamaı birin-biri júr ǵoı ańdyp.
Mal men baqtyń keseli uıa buzar,
Parýardıgár jaratqan nesin jan qyp!

Ant ishin kúnde bergen jany qursyn,
Aryn satyp tilengen maly qurysyn.
Qysqa kúnde qyryq jerge qoıma qoıyp,
Qý tilmen qýlyq saýǵan zańy qursyn.
Bir atqa júz qubylǵan júzi kúıgir,
Óz úıinde shertıgen pańy qursyn.

1 - Elý úıdiń atynan saılanǵan elýbasylar kishkene tasty (shardy) eki uıaly jáshikke salý arqyly bolysty saılaýǵa daýystaryn beretin bolǵan. Ony jurt sol kezde «shar salý» dep ataǵan.

---