InfoHub Logo

Baıjan — orta sharýa, jasynyń úlkendigimen birge óz aýylyna, kórshiles aýyldarǵa da ınabatty adam.

Birde ol, kúndegi ádetinshe, erte turyp namazyn oqydy da, mal jaıǵastyrýǵa shyqty. Kenet, onyń qyraǵy kózi qoradan shyǵyp bara jatqan qasqyrdy kórdi. Dereý kók aıǵyrǵa yrǵyp minip, qolyna soıylshasyn aldy da, kókjaldy qýa jóneldi. Tań sáride ony soǵyp alyp, kezdeısoq oljaǵa bata qalmaq. Kókjal pármenimen qaryshtaı júgirip qashsa da, kók aıǵyr onyń adymyn ashyrmady. Aýyl syrtyndaǵy qyrqadan qaıyra qýyp, qoraǵa ákelip tyqty. Ábden sharshap silesi qatqan kókjal «endi ne isteseń de, erkiń» degendeı qarsy qarap, tilin salaqtatyp, júresinen jata qaldy. Kók aıǵyrdyń aq kóbigin aǵyzyp, Baıjekeń de kelip jetti.

Bul kezde úıdegi adamdar da turyp, mal jaıǵastyra bastaǵan edi. Ózderiniń asyrandy ıti kók tóbet tili salaqtap, eki ezýinen silemeıi shubyryp jatyr, aıanyshty túrde árkimge jaýtańdap qaraıdy. Kók aıǵyr da terge malshynǵan, býy burqyrap tur.

— Aı, ata, munyńyz qalaı, mynaý ózimizdiń kók tóbet emes pe?! — desti qaqpa aldynda turǵandar.

Baıjekeń atynan yrǵyp túse qaldy. Qasqyrǵa jeter-jetpes bolyp, umtyla shaýyp júrgen kezde astyndaǵy toqymnyń túsip qalǵanyn da sezbepti, shalbary men kúpisiniń etegi terge malshynypty.

— Qasqyr eken desem, ózimizdiń kók tóbet eken ǵoı, — dep qynjyla sóılep, úıge kirdi «ańshy» otaǵasy.

---