Sý surasa sút bergen, aıran bergen,
Qartaıyp qalypsyń-aý, qaıran jeńgem!
Qarǵanyń valetindeı edireıip,
Qasyńa myna bireý qaıdan kelgen?
Apyraı, sýyq edi surqy neden?!
Adamǵa qaraıdy ǵoı syrtymenen.
Jol kórsetkish saqshynyń taıaǵyndaı,
Qımylyndy baǵyp tur murtymenen.
Jeńeshe-aý, esińde me bizdiń aǵaı?
Syılasyp otyrar ek biz qudadaı.
Qandy balaq soǵysty qarǵys atsyn,
Qaıran jeńgem, shyrqyndy buzdy qalaı
Kúlkiń qaıda kúmisteı syńǵyrlaǵan?
Júziń nege ymyrttaı túnjyraǵan?
Buǵalyqqa turmaıtyn asaý ediń,
Seni ákelip teligen kim mynaǵan?
Óziń bolsań, tym aǵat oılanǵansyń,
Baqyt emes, basyńa qaıǵy alǵansyń,
Jan edin ǵoı janynyń talǵamy bar,
Qara murtqa qalaısha baılanǵansyń?!
El-jurtyń qaraýshy edi maqtan etip.
Kıip ap aıaǵyńa saltama etik,
Talaılardan ketýshi eń attap etip,
Talaılardy júrýshi eń taptap etip...
Qartaıyp qalypsyń-aý, qaıran jeńgem!
Qaıǵyǵa moıymaýshy eń.
Qaıdan kelgen?!
Saǵynyp júrsiń be álde, qadirlim-aı,
Baıaǵy jastyǵyńdy maıdanda ólgen?..

---