InfoHub Logo

Bilim jáne ǵylym mınıstrliginiń tapsyrmasy boıynsha Ulttyq bıotehnologıa ortalyǵy men Bıologıalyq qaýipsizdik problemalarynyń ǵylymı-zertteý ınstıtýty birlesip, COVID-19 koronavırýsyna qarsy vaksına ázirleýge kiristi.

«Bizdiń uıymdarda jınaqtalǵan tájirıbe barshylyq. Zamanǵa saı ǵylymı baza da bar. Óndiris tehnologıalaryn damytyp, synaqtan ótkizip, sheteldik balamalardan tıimdiligi kem túspeıtin otandyq dári-dármekti ázirleıtin mamandar jumys isteıdi», - dep málim etti QR BǴM Bıologıalyq qaýipsizdik problemalarynyń ǵylymı-zertteý ınstıtýtynan.

Máselen, qańtar aıynyń sońynda Ulttyq bıotehnologıa ortalyǵynyń ǵalymdary COVID-19 koronavırýsyn 6 kúnniń ishinde anyqtaıtyn test júıesin oılap tapqan. Qazaqstandyq test júıesiniń tıimdiligi men ótkir sezimtaldyǵy reseılik jáne qytaılyq dıagnostıkalyq dıagnostıkýmdardan kem emestigi anyqtalǵan.

Bilim jáne ǵylym mınıstrligi Ǵylym komıtetiniń «Bıologıalyq qaýipsizdik máseleleri jónindegi ǵylymı-zertteý ınstıtýty» (Jambyl oblysy, Otar kenti) qus pen dońyz tumaýyna qarsy vaksınalardy jasap shyǵarǵan. Qurylǵaly 60 jyldyń ishinde ınstıtýt bıoqaýipsizdik, bıotehnologıa, vırýsologıa, mıkrobıologıa jáne ımmýnologıa salasynda úlken tájirıbe jınaqtady. Instıtýt ǵalymdary dári-dármektiń 60-tan astam túrin, sonyń ishinde 30 vaksınany, 16 synaq júıesin jáne 15-ten astam túrli bıologıalyq ónimdi jasap shyǵardy. Bul ınstıtýtta vırýstardyń genetıkalyq kitaphanasynyń biregeı derekqory bar.

Vaksınalardy damytý baǵdarlamasy aıasynda bıotehnologıalyq jáne gendik ınjenerıanyń aldyńǵy qatarly ádisterin qoldana otyryp, 5 kandıdattyq vaksına jasalady. Uqsas tehnologıalardy vaksınalar jasaý salasynda álemdik kóshbasshylar qoldanady. Kandıdattyq vaksınalardyń bes túriniń ishinen klınıkalyq zertteýlerdi júrgizýge arnalǵan eń tıimdi jáne tehnologıalyq turǵyda jetildirilgen vaksına tańdap alynady.

«Álemniń kóptegen eli ózderiniń vaksınalaryn ázirlep shyǵarǵanyn jarıalady. Alaıda munyń bári klınıkalyq zertteýdi qajet etip, jumys bir jyldan keıin aıaqtalady. Vaksınany qabyldaǵanǵa deıin COVID-19 vırýsynyń taralýynyń aldyn alý qajet. Áıtse de bul tek memleket qabyldaǵan sharalarǵa ǵana emes, sonymen birge ár adamǵa da baılanysty. Sondyqtan barlyq aldyn-alý sharasyn saqtaý qajet», - dep tolyqtyrdy ǵylymı-zertteý ınstıtýtynan.

---