InfoHub Logo

Bıylǵy oqý jylynda Qazaqstannyń oqý oryndarynda 18 myń sheteldik stýdent bilim alyp jatyr, dep QR Bilim jáne ǵylym mınıstrligi habarlaıdy.

«Bıyl Qazaqstanda 18 myń sheteldik stýdent bilim alyp jatyr. Olardyń kópshiligi Shanhaı yntymaqtastyq uıymyna múshe elderden kelgen. Bizdiń maqsatymyz - sheteldik stýdentter sanyn shamamen 40 myńǵa deıin jetkizý. Jyl saıyn 20 prosentke kóbeıtip otyrsaq, aldaǵy 5-6 jylda Qazaqstan aıtarlyqtaı aýqymdy bilim berý habyna aınalady. Ol úshin birneshe sharalar jasaldy: aǵylshyn tilinde sabaq berý, jańa baǵdarlamalar daıyndaý, ýnıversıtterge akademıalyq derbestik berý. Endi ýnıversıttiń ózderi jumysqa kirisýi kerek», - dedi mınıstr SHYU múshe-memleketterdiń bilim mınıstrleriniń jetinshi keńesinde.

Sonymen birge, mınıstr Qazaqstannyń medısınalyq mamandyqtar boıynsha úndistandyq stýdentterdi kóbirek qabyldaýǵa jáne IT baǵyttar boıynsha Úndistanǵa magıstranttar men doktoranttardy jiberýge ýaǵdalasqanyn habarlady.

«Keı baǵyttar bizdiń elimizde jaqsy jolǵa qoıylǵan, al ekinshi bir salalar boıynsha Úndistannyń tájirıbesi myqty. Sondyqtan, bul kelisim qos eldiń stýdentteri úshin de óte paıdaly», - dedi E. Saǵadıev.

Aıta keteıik, Shanhaı yntymaqtastyq uıymyna Qazaqstan, Qyrǵyzstan, Qytaı, Reseı, Tájikstan jáne Ózbekstan elderi múshe. Ótken jyly Astanada ótken SHYU múshe-memleketter basshylarynyń Keńesinde uıymǵa múshe mártebesi Úndistan men Pákistanǵa berilgen bolatyn.

---