InfoHub Logo

S. Amanjolov atyndaǵy Shyǵys Qazaqstan ýnıversıtetiniń ǵalymdary jatyr moıny obyryn keshendi dıagnostıkalaýǵa arnalǵan eritindi jasap shyǵardy.

Eki jyl boıy ǵylymı qyzmetkerler saýyqtyrý ortalyǵynyń ókilderimen birlese sıtologıa salasynda suranysqa ıe suıyqtyq quramyn jasady.

Nátıjesinde olar buryn shetelden alynyp kelgen ónimdi óz elimizde shyǵardy. Endi ǵalymdardyń bul jańalyǵy medısınalyq qyzmettiń qunyn tómendetýge múmkindik beredi. Óıtkeni ol qarjylyq jaǵynan da, geografıalyq jaǵynan da qoljetimdi bola túspek. Ǵalymdardyń aıtýynsha, eritindiniń sapasy sheteldik analogtardan kem túspeıdi.

«Ǵalymdarymyzdyń jasap shyǵarǵan týyndysy ımportty almastyrý máselesin sheshedi. Osy zertteýdiń nátıjesinde bıomaterıaldy saqtaýǵa arnalǵan bekitýshi eritindiniń ońtaıly quramy jasaldy. Bul bıomaterıaldardy turaqtandyrýǵa jáne tasymaldaýǵa múmkindik beredi, ıaǵnı onkologıalyq aýrýdy odan ári dıagnostıkalaý úshin jatyr moınyna jaqpa retinde paıdalanylady. Bul ázirlemeniń biregeıligi — qaterli isikti tez dıagnostıkalaý máselelerin keshendi túrde sheshý bolyp tabylady», -dedi S.Amanjolov atyndaǵy Shyǵys Qazaqstan ýnıversıteti Ulttyq ǵylymı zerthanasynyń kishi ǵylymı qyzmetkeri Aıdana Imasheva.

Aıta keteıik, ǵalymdar toby ózderi ázirlegen bekitýshi eritindige patent aldy. Nátıjesinde bul ónim Qazaqstan Respýblıkasynyń dárilik zattar men medısınalyq buıymdar tizilimine engizildi. Qazirgi tańda joba komersıalandyrý satysynda. Sonymen qatar ǵalymdar basqa da bıologıalyq materıaldardy saqtaý eritindisiniń quramyn jaqsartý barysynda jumys isteýde.

---