InfoHub Logo

Qazaqstandyq ǵalymdardyń 14 ǵylymı ázirlemesi halyqaralyq naryqqa shyqty jáne endi Qytaı, Reseı, Túrkıa, Grýzıa, Chehıa, Qyrǵyzstan sıaqty elderge eksportqa shyǵarylyp jatyr.

Barlyq joba Qazaqstan Respýblıkasy Bilim jáne ǵylym mınıstrligi Ǵylym qorynyń qoldaýymen júzege asyryldy. Satý kólemi júzdegen mıllıon teńgeden asyp, ǵalymdar pasıvti kiris alyp otyr. Ǵylymı ázirlemelerdiń qatarynda – kobált-57 radıoızotopy, zeńge qarsy dárilik preparat, medısınalyq, taǵamdyq jáne turǵyn úı-jaılardy sanasıalaýǵa arnalǵan bıopreparattar, sút sarysýy negizindegi sýsyndar, probıotıkter jáne taǵy basqalar bar.

«Ǵylym qory óziniń 15 jyldyǵyn atap ótip jatyr. Sońǵy eki jylda 130-ǵa jýyq joba qarjylandyryldy. Qor ǵylymı jáne ǵylymı-tehnıkalyq qyzmet nátıjelerin komersıalandyrýǵa arnalǵan jobalardy granttyq qarjylandyrý boıynsha operator bolyp tabylady. Búgingi tańda biz 113 ǵylymdy qajetsinetin óndiristi iske qostyq, onyń 14-i ónim eksportyna shyǵaryldy. 1,5 myńǵa jýyq jumys orny quryldy. Zıatkerlik menshik avtorlary men ǵylymı ázirlemelerdi paıdalanatyn kásiporyndar arasynda 45 lısenzıalyq kelisim jasaldy», – dep atap ótti QR BǴM Ǵylym qory basqarmasynyń tóraǵasy Aryn Orsarıev.

Iadrolyq fızıka ınstıtýtynyń ǵalymdary kobált-57 radıoaktıvti ızotopyn arzan baǵamen óndirýdiń jańa tehnologıasyn jasady. Bul ónim ıadrolyq medısınada, ǵylymı zertteýlerge arnalǵan quraldardy óndirýde medısınalyq tomograftardyń jumys isteý sapasyn baqylaý úshin qoldanylady. Joba komersıalandyryldy jáne otandyq ǵalymdardyń tehnologıasy boıynsha kobált-57 ızotopynyń eritindisi ónerkásip óndirisiniń kóleminde shyǵaryla bastady. Qazaqstandyq ónim halyqaralyq naryqqa shyǵyp, búginde kobált radıoızotopy partıasy Reseıge jetkizilýde.

Memlekettik qoldaýdyń nátıjesinde qazaqstandyq ǵalymdar sheteldik ǵalymdarmen qatar medısına, nano jáne bıotehnologıa, jasandy ıntellekt, geologıa, mıneraldyq jáne kómirsýtekti shıkizatty qaıta óńdeý, aýyl sharýashylyǵy ónimderiniń qaýipsizdigi jáne ekologıa salalaryndaǵy zamanaýı ázirlemelerge qatysyp jatyr.

Ǵylym qorynyń qoldaýymen elimizde jel jáne kún energıasyn óndiretin biregeı generatorlar óndirisi jolǵa qoıylǵan.

«Qondyrǵy syrtqy qýat kózin qosýdy qajet etpeıdi, negizgi jáne rezervtik qýat kózi retinde paıdalanylady. Sonymen qatar elektr jelisinen alys ornalasqan nysandardy qýatpen jabdyqtaý máselesin sheshýge múmkindik beredi. Jel generatorlary daýyl jelderine, daýyldarǵa, muzdaný, tómen temperatýraǵa tózimdi. Atalǵan generatorlardy jergilikti jerdiń geografıalyq jáne klımattyq erekshelikterine qaramastan paıdalanýǵa bolady. Qondyrǵylar úlken suranysqa ıe, búgingi tańda satylym kólemi 100 mln teńgeden asty», – dedi joba jetekshisi Janbolat Muzbaev.

Mıkrobıologıa jáne vırýsologıa ınstıtýtynyń ǵalymdary zeńge qarsy «Rozeofýngın-AS» preparatyn oılap tapty. Jaqpa teri mıkozdaryn emdeýge arnalǵan jáne joǵary tıimdiligin kórsetti. Preparat biregeı quramymen jáne zeńge qarsy áser etý spektriniń keńdigimen erekshelenedi. «Rozeofýngın-AS» preparaty Dıagnostıkalaý men emdeýdiń klınıkalyq hattamasy dárileriniń tizimine jáne Qazaqstandyq ulttyq dárilik formýláryna kirdi.

---