InfoHub Logo

«Sáken Seıfýllın atyndaǵy Qazaq agrotehnıkalyq ýnıversıteti» AQ basqarma tóraǵasy Aqylbek Kúrishbaev Memleket basshynyń bıylǵy Joldaýy aıasynda oqytýshylardyń jalaqysyn kóterýdi kózdeıdi.

«Qazirgi kezde Elbasynyń Joldaýyn iske asyrýdyń jospary daıarlanyp jatyr. Biz oǵan ún qosýymyz qajet. Kúni keshe bilim jáne ǵylym mınıstrligine, sondaı-aq aýyl sharýashylyǵy mınıstrligine hat daıyndadyq. Sonda Memleket basshysynyń árbir tapsyrmasy boıynsha óz usynysymyzdy jazdyq», - dedi Kúrishbaev búgingi jıyn barysynda.

Onyń aıtýynsha, hatta kórsetilgen usynystardyń biri - Qazaq agrotehnıkalyq ýnıversıtettiń bazasynda ǵylymı-zertteý ýnıversıtetin qurý. Sondaı-aq tehnıkalyq bazany kúsheıtý máselesi qarastyrylǵan. «Úshinshi másele - oqytýshylardyń jalaqysy. Shetelde oqytýshylardyń jalaqysy joǵary. Demek, adamnyń eńbegi laıyqty baǵalanady. Árıne, bári el búdjetine baılanysty. Biz memlekettik granttardyń kólemin ulttyq ýnıversıtetterdiń deńgeıine deıin kóterýdi usynyp otyrmyz. Sheteldiń qaı jerine barsań da, barlyq joǵary oqý oryndaryna teń qaraıdy. Sóıtip, básekelestik qyza túsedi. Al bizde ondaı básekelestik joq. Sebebi ulttyq ýnıversıtetterge beriletin granttardyń somasy 646 myń teńgege deıin jetse, bizde 346 myń teńgeni quraıdy. Sonyń saldarynan jalaqynyń kólemi de tómen bolady. Olaı bolǵan durys emes. Biz granttardyń somasyn teńestirýdi usynyp otyrmyz», - deıdi Aqylbek Qajyǵululy.     

---