Qazdar qaıtyp barady mekenine,
(Qanaty bar maqulyq ketedi de).
Qaz-qaz basyp, qaltyrap qarıa tur
Dármeni joq taıaǵyn kóterýge.
Qarashanyń qalyqtap jelimenen,
Qazdar ketti qoshtasyp kólimenen,
Qaıtqan qustyń qarıa qanatyna
Qaraıdy kózin súrtip jeńimenen.
Qazdar qaıtyp barady tizbektelip,
İzdep ketti kóktemdi, izdep kelip.
Qarashada qaltyrap qarıa tur
Taǵy da bir sup-surǵylt kúzdi ótkerip.
Qazdar ketti, qulaqta úni qaldy,
Jazdy áketti.
Áketti tunyq ándi,
Qaıtqan qustan qara úzip qalsa-daǵy,
Qaltyldaǵan qarıa, turyp aldy.
Qarashanyń ulysa jeli gýlep,
Túsine ber qańtardyń jeligi dep.
...Qısaıyp bara jatqan qarıany
Súıeı berdi balasy, kelini kep...
At sýara barǵanda jylǵaǵa men,
Ashań júziń ashylyp, bir qarap eń.
Qulaǵyńda aı-syrǵań dir-dir etip,
Endi úzilip keterdeı turǵan áreń.
Qımyl saıyn maıysyp bos býynyń,
Asylyp tur arqańa qos burymyń.
Qula besti qulaǵyn tige qaldy,
Qyz kórmegen maqulyq qosqyrýyn!
Jaqyndatpaı janyńa úrikti kep,
Tarpań neme týlap túr búlik tilep.
Jolbarystaı atylyp tizgindi aldyń,
Jigit júrek qyz ediń, jigit júrek.
Tarpań neme taısaldy qýatyńnan,
Qulaı tústim qasyńa qula atymnan.
Erge qondyń.
Jóneldiń en dalaǵa,
Artynda tek shań qaldy shubatylǵan.
Qula saıtan barady oqtaı aǵyp,
Shyt kóılegiń alaýlap ottaı janyp,
Áýdem jerge jetkende buryldyń da,
Qol bulǵadyń artyńa toqtaı qalyp.
Kim boldy eken jolyńdy toryp júrgen?
Bireý bardy qasyńa tory mingen.
Tentekterdiń ózimdeı biri ǵoı dep,
Áıteýir jaqsylyqqa jorydym men.
Quıyn bop qyrǵa tarttyń ekeýin, de,
Qula ketti torynyń jeteginde.
Kumdy qushyp, dármensiz qala berdim,
Qýatym joq eńsemdi kóterýge.
Aınalamda dúrlikti aýyl bolyp,
Adastyrdyń basyńa baǵyń qonyp.
Quıyn bolyp jylǵadan bastadyń da,
Sardalada joǵaldyń saǵym bolyp.
Qıdym saǵan qula attyń tuıaq kúshin,
Qarǵamaımyn, demeımin uıattysyń.
Saǵym bolyp alystap ketkenińmen,
Samal bop oralatyn sıaqtysyń.
Serigińmen sen asqan jumbaq qyrdan,
Jumbaq qyrdan - júrekke muń qaptyrǵan
Saǵym júrse, telmirem sen eken dep,
Jete almaı oramalyn bulǵap turǵan.

---