Qıystyryp maqtaısyz,
Oılasań ne tappaısyz?
Bizde erik joq, óziń bil,
Álde nege bastaısyz.

Biz de árkimdi baıqaımyz,
Tap bergennen taıqaımyz.
Sizdeı asyl kez bolsa,
Qaıtip basty shaıqaımyz?
Aqylyńa sóziń saı,
Siz – jalyn shoq, biz – bir maı.
Ystyq sóziń kirdi ishke,
Maı tura ma shyjymaı.

Qabyl kórseń, kóńilim jaı,
Tastap ketseń, ıapyrmaı,
It qor adam bolar ma,
Bul jalǵanda sorlyńdaı?

Tilegimdi bermeseń,
Amalym ne jerleseń?
Úıir qylma boıyńa,
Shyny jaqsy kórmeseń.

Qaıǵyń bolar shermen teń,
Qara kóńilim jermen teń.
Sensiz maǵan jat tósek
Bolar beıne kórmen teń.

Siz – bir suńqar shahbaz1,
Jer júzinen alǵan baj2.
Bizdeı ǵarip esepsiz,
Esiginde júr muqtaj.

Kóńiliń tursa bizdi alyp,
Shynymenen qozǵalyp,
Biz – qyrǵaýyl, siz – tuıǵyn,
Toıattaı ber, kel de alyp.

Tal jibekteı oralyp,
Gúl shybyqtaı buralyp.
Salmaǵyńnan janshylyp,
Qalsyn qumar bir qanyp...

Muny jazdym oılanyp,
Oıda bardan tolǵanyp.
Kirse ishińe oqı ber,
Bozbalalar, qolǵa alyp.

Muny oqysa kim tanyp,
Júregine ot janyp,
Sózdi uǵarlyq jan tapsa,
Aıtsa jarar án salyp.

Óleń jıǵan tyrbanyp,
Án úırengen yrǵalyp.
Sorly Kókbaı qor boldy-aý,
Osynshadan qur qalyp.


1 Shahbaz (parsysha) – qarshyǵa, lashyn, suńqar jáne erjúrek batyr maǵynasynda da qoldanylatyn sóz.
2 Baj (parsysha) – alym-salyq. Bul jerde toıat alý, toıattaý degen aýyspaly maǵynada qoldanylǵan.

---