Qyzaryp, surlanyp,
Lúpildep júregi.
Ózgeden urlanyp,
Ózdi-ózi keregi.

Eki asyq qumarly,
Bir joldan qaıta almaı.
Jolyqsa ol zarly,
Sóz jóndep aıta almaı.

Aıańdap aqyryn,
Júrekpen alysyp,
Sybdyryn, tyqyryn,
Kóńilmen tanysyp.

Dem alys ysynyp,
Saýsaǵy sýynyp.
Belgisiz qysylyp,
Pishini qubylyp.

Iyǵy tıisip,
Tumandap kózderi.
Úndemeı súıisip,
Mas bolyp ózderi.

Janynda japyraq,
Ústinde juldyz da.
Elbirep-qaltyrap,
Jigit pen ol qyz da.

Ózge oıdan tyıylyp,
Birimen biri áýre.
Júrekke quıylyp
Jan rahat bir sáýle.

Júregi eljirep,
Býyndar bosanyp.
Rahatpen álsirep,
Kózine jas alyp.

Júırik til, tereń oı,
Sol kúnde qaıda ediń?
Ǵashyqqa moıyn qoı,
Jeńildiń, jeńildiń!..

---