InfoHub Logo

Ertede bir kedeı jol júrip kele jatyp, bir baıdyń úıine kirip keledi. Sol kezde baı úıinde tamaq jep otyr eken. Kedeı:

— Men jol júrip, qarnym ashyp keledi. Jep otyrǵan tamaǵyńyzdan aýyz tıgizińiz, baıeke! — deıdi. Baı:

— Meniń saǵan arnaýly tamaǵym joq, — dep, jep otyrǵan tamaǵynan kedeıge bermeı, asyǵa-usyǵa jep qoıypty. Jep otyrǵan tamaǵymnyń ústine kelip, jemeseń de, ıisin ıiskep qaldyń ǵoı, — depti.

Kedeı men baı osylaı áńgimelesip otyrǵanda, Qojanasyr kelip qalyp:

— Nege kóńilsiz sóılesip otyrsyzdar? Ne boldy sizderge? — dep surapty.

Sonda kedeı Qojanasyrǵa baımen ekeýiniń arasyndaǵy áńgimeni aıtyp beripti. Qojanasyr da baı men kedeı arasyndaǵy bolǵan áńgimege tez túsine qalyp, baıǵa:

— Baıeke, mende kóp aqsha bar. Saǵan aqsha kerek bolatyn bolsa, men saǵan qolymdaǵy aqshamnan, kerek deseńiz, barlyǵyn qaryz bereıin, — depti. Sonda baı:

— Qane, kórsetshi aqshańdy, — dep Qojanasyrdan suraıdy.

— Qaltasyndaǵy aqshasyn sýyryp alyp, baıǵa kórsetse, baı:

— Osy aqshańdy qansha bolsa da qaryzǵa ber. Maǵan aqsha óte zárý edi, — dep Qojanasyrdyń eteginen ustap, jibermeı jaby sa ketedi. Sonda Qojanasyr:

— Oıbaı-aý, saǵan bul aqshamdy bere almaımyn, ózimniń qarajatyma kerek, — dep aqshasyn tezden qaltasyna sala salyp:

— Aqshamnyń ózin almasań da, eń bolmasa túsin kórip qaldyń ǵoı, — dep Qojanasyr kedeıdi jaqtaǵan eken.

---