InfoHub Logo

Baıaǵy ótken zamanda qoltyraýyn men pil bir-birine ǵashyq bolypty deıdi. Sosyn olar dúnıeni dúr silkindiretin toı jasap shańyraq kóteredi. Ózara mahabbattarynyń kúshtiligi sondaı — bir-birine ózderi úshin eń qundy dúnıelerin berýden jarysqa túsipti. Qoltyraýyn sýǵa súńgip ketedi de, eń keremet balyqtardy ustap, pilge ákelip beredi. Al pil bolsa, kók maısanyń eń jumsaq jerlerin tańdap taýyp ǵashyǵyna aparatyn kórinedi. Biraq nátıjede ekeýiniń de kóńilderi muńdy. Et jeıtin qoltyraýynǵa pildiń syıy, kók jeıtin pilge onyń syılyǵy unamaıdy. Sóıtip ekeýiniń de nıeti adal, peıili taza bolǵanymen, tabıǵat zańy turǵysynan qate tirlik jasap júrgen eken. Osyny túsingen ekeýi budan bylaı ózderine emes, jarlaryna unaıtyn nárseni syılaýǵa tyrysatyn bolypty. Eki ǵashyq maqsat-murattaryna osylaısha birge jetipti.

Bul áńgime búgingi otbasylardyń keıbir syrlaryn túsinýge kómek beredi. Adam arasyndaǵy erli-zaıypty pil men qoltyraýyn sıaqty syrtqy kórinisteri bólek jaratylys bolmasa da, olardyń tabıǵattarynda bir-birinen kóptegen erekshelikter bar. Erkek — kúshti, áıel — názik. Áıel — sezimtal, er adam — salqyn qandy. Áıeldiń sózi jyldam, erkektiń qoly jyldam degendeı. Odan bólek ekeýiniń eki túrli ortada ósip, jetilýiniń ózi arada birtalaı aıyrmashylyqtyń bolýyn zańdy etedi. Olaı bolsa, olardyń bir-birine: «Nege sen dál mendeı emessiń» dep ókpeleýge quqyqtary joq. Sondyqtan atam qazaq «Úı bolý-ońaı, úılesý-qıyn» dep beker aıtpaǵan.

Qysqasyn aıtqanda, otbasyn qurǵan eki jarty bir bútin bolýy úshin bir-birimen sol tabıǵı qalpynda úılesip ketýi kerek. Ekeýi bir-biriniń tabıǵatyn, minez-qulqyn, temperamentin, jaqsy kórip unatatyn isterin zerttep úırenip alǵandary durys. Biraq buǵan mindetti túrde eki jaq ta atsalysýy tıis. Sonda otbasy maqsat-muratyna jetedi. Barshańyzǵa otbasylyq baqyt tileımiz.

E. Ertaıuly («Jubaıyńnyń júregin jaralama — jaýla» kitabynan)

---