InfoHub Logo

Qorqyttyń qyryq jyl ǵana ómir súretini aıan bolady. Osydan keıin Jelmaıasyn jeldeı ushyryp ólimnen qashady ǵoı. Qashqanmen Janalǵysh aldyn orap, qaıda barsa Qorqyttyń kórin qazdyryp jatady. Biraq kópke deıin Janalǵysh Qorqyttyń janyn alýǵa bata almaı, qur bosqa tóńirekteýmen bolady.

Aqyry, bir kúni Janalǵysh altynnan sandyq soqtyryp, Qorqyttyń janyn alýǵa bel býyp, saılanyp shyǵady. Muny kúni buryn boljap bilgen Qorqyt ajaldyń tuzaǵyna túspeýdiń amalyn oılaıdy.

Kúnderdiń kúninde Janalǵysh aqyry Qorqytpen betpe-bet kelip: «Kir myna sandyqqa!» dep buıyrady. Qorqyt bolsa kúni buryn oılastyrǵan amalyna salyp: «Kirýin kirer edim, biraq myna qalpymda sandyqqa qalaı sıamyn? Aldymen óziń kirip kórset, sonan soń degeniń bolsyn!» — deıdi. Sol jerde Janalǵysh sandyqqa kirip kórsetpekshi bolǵanda Qorqyt ony tars jaýyp, aýzyn ashylmastaı bekitedi de, darıanyń sýyna aǵyzyp jiberedi.

Janalǵysh sandyqqa qamalǵan qalpy aǵyp kete barady. Sóıtip, halyq kópke deıin ólim degendi bilmeı, shat-shadymen ǵumyr keshetin bolady.

Sol kezde darıanyń aıaǵynda aýy bos shyqpaıtyn keremet bir aqjoltaı balyqshy bolady eken. Birde Janalǵysh qamalǵan sandyq álgi balyqshynyń aýyna túsedi ǵoı. Balyqshy «bul ne ǵylǵan sandyq» dep aýzyn ashqanda, sandyq ishinen doldana aqyryp Janalǵysh shyǵady. Ashý ústinde kózine kóringen balyqshynyń janyn alady. Sonan soń, Qorqyttyń janyn alý úshin kektengen qalpy izdep ketedi.

Al Qorqyt bolsa bul kezde Janalǵyshtyń ókshesine túskenin esine alyp, «ańdyǵan jaý — almaı qoımas!» dep muńaıyp, sol kóńil-kúıin qońyrlatyp qobyzyna salǵan eken.

---